سەرۆکى حکومەتى کاربەڕێکەرى هەرێم رایگەیاند، لەم رۆژانەدا سەردانى بەغداد دەکات بۆ گفتوگۆکردن لەگەڵ لایەنى عێراقى لەسەر پشکى هەرێم. دەشڵێت، " ئاگادارین مامۆستایان لە دۆخێکی سەختی دارایدان."
رۆژی چوارشەممە، مەسرور بارزانی سەرۆکی حکومەتی کاربەڕێکەری هەرێم لەکاتى لێدانى زەنگى دەستپێکردنى دەوامى قوتابیان لە یەکێک لە قوتابخانە ئەهلییەکاندا رایگەیاند، بۆ گفتوگۆکردن لەسەر موچەی فەرمانبەرانی هەرێم سەردانی بەغداد دەکات و بۆ ئەو مەبەستە لەگەڵ لایەنی عێراقی کۆدەبێتەوە.
وتیشی، "هەموو
هەوڵێک دەدەن بۆ ئەوەى لە بەغداوە پشکى هەرێمى کوردستان بنێردرێت و موچەى
فەرمانبەران و مامۆستایان دابەش بکرێت".
ئاماژەی بەوەشکرد،
ئاگادارن مامۆستایان فشارێکى زۆرى داراییان لەسەرە، بەڵام دەبێت خۆڕاگربن.
قسەکانى سەرۆکى
حکومەتى کاربەڕێکەرى هەرێم دواى ئەوەدێت کە محەمەد شیاع سودانى سەرۆک وەزیرانى عێراق
لە کۆبونەوەیەکدا لەگەڵ ئیدارەى دەوڵەت رایگەیاند، هەرێم پابەندى یاسایی بودجە نەبوە و ناچارى دەکەن بە زمانى ژمارەکان قسەیان
لەگەڵدا بکات.
ئەمە لەکاتێکدایە،
فەرمانبەرانى هەرێم دوو مانگە موچەیان وەرنەگرتووە و حکومەتى کاربکەڕێکەریش تائێستا
داهاتى ناوخۆى نەکردوە بە موچە و رادەستی بەغداشى نەکردووە، ئەوەش هێندەى تر
گومانى لاى بەغداد دروستکردووە.