ئامارەکانى وەزارەتى رۆشنبیرى و گەشتیارى تورکیا دەشڵێت لە پلەى دووەمدا سعودییە دێت کە لەم حەوت مانگەدا ٥١٢ هەزار گەشتیاریان چوونە تورکیا، دواتریش کوەیت و ئوردن و پاشانیش مەغریب و جەزائیر دێن.

بەپێى ئامارەکە هەرچەندە عێراق لە پلەى یەکەمدا هاتووە، بەڵام ژمارەى گەشتیارەکانى بەراورد بە حەوت مانگى سەرەتاى ساڵى پێشوو نزیکەى ٥٨ هەزار کەمیکردووە، بەتایبەتى لە ناوچەکانى هەرێمى کوردستانەوە، چونکە سەربارى راگرتنى هێڵەکانى تورکیش ئێرلاین بۆ فڕۆکەخانەى سلێمانى، ئاستی بژێوى هاوڵاتیانیش بە تەواوەتى دابەزیوە، بەو پێیەى حکومەتى کاربەرێکەر لەمساڵدا موچەى مانگانەى دابەشنەکردووە و بەوەش هاوڵاتیان نەک نەیانتوانیوە سەفەربکەن، بەڵکو موچەکانیان بەشى بژێوىی و ژیانى خۆیانی نەکردوە.

وەزارەتى رۆشنبیرى و گەشتیارى تورکیا هەشت وڵاتى وەک دیارترینی ئەو وڵاتانە دیاریکردووە کە زۆرترین گەشتیاریان سەردانى تورکیا دەکەن، کە بریتین لە روسیا، ئەڵمانیا، بولگاریا، جۆرجیا، ئێران و پۆڵەندا و هۆڵەندا و عێراق.

پێشتر ماڵپەڕى تەرەتەى نزیک لە حکومەتى تورکیا بڵاوى کردەوە، ساڵى رابردوو نزیکەى ٥٠ ملیۆن کەس وەک گەشتیار سەردانى تورکیایان کردووە و داهاتى ساڵەکەش زیاتر لە ٤٦ ملیار دۆلاربووە.