بەشار ئەسەد ئاماژەی بەوەکرد، هێزە ئۆپۆزسیۆنەکانی وەک بەرەی نوسڕە و ئەحرار ئەلشام دروست کراوی تورکیان، بەڵام تورکیا وەک تیرۆرست باسیان دەکات و دەڵێت هەرەشەن بۆسەر سوریا.

سەرۆکى سوریا ئەوەی خستەڕوو، لە ماوەی ١٢ ساڵی رابردوو رژێمەکەی کارێکی راستی کردووە لە رووبەڕووبوونەوەی هێزەکانی ئۆپۆزسیۆن و ئەگەر کات بگەرێتەوە هەمان سیاسەت پەیڕەو دەکات.

باسی لەوەکرد، سەرەڕەی ئەوەی لەلایەن کۆمەڵگای نێودەوڵەتییەوە داوای لێکراوە دەسەڵات جێبهێڵێت، بەڵام ئەم رەتیدەکاتەوە و بەو کردەوەیە دەڵێت "هەڵهاتن."

بەشار ئەسەد ئەوەی ئاشکرا کرد، تاکو ئێستا پەیوەندییەکانی سوریا و وڵاتەنی عەرەبی تەنیا رووکەشییەوە و زۆربەی پەیوەندییەکانی نێوانیان تەنیا وتارخوێندنەوەیە و دەشڵێت، "کۆمکاری عەرەبی تاکو ئێستا نەبووە بە دامەزراوەیەکی راستەقینە تاکو کێشەی وڵاتە عەرەبییەکان چارەسەر بکات."

رووداوەکانی قەیرانی سوریا لە مانگی ئازاری ساڵی ٢٠١١ بە خۆپیشاندانی زۆربەی شارەکانی ئەو وڵاتە دەستی پێکرد و داواکارییەکان پەیڕەوی ئازادی و ئازادکردنی زیندانە سیاسییەکان بوو و دواتر باری لەناکاو راگەیەنراو بارودۆخەکە ناجێگیر بوو، داواکارییەکان بوون بە رووخاندنی رژێمی بەشار ئەسەد.

لە رێکەوتی ٧ی مانگی ئایاری ئەمساڵ بە بڕیاری فەرمی سوریا گەڕایەوە بۆ نێو کۆمکاری وڵاتانی عەرەبی، ئەمەش لە دوای ئەوەی ١٢ ساڵ لەمەوبەر بەهۆی هەڵگیرسانی گرژییەکانی ئەو وڵاتە لەو کۆمەڵەیە سڕ کرا.