بەڕێوەبەرایەتی هاتووچۆی سلێمانی رایگەیاند، سبەی لە کاتژمێر ٨:٠٠ـی بەیانییەوە کامێراکانی خاڵ بۆ خاڵ سەرپێچی تۆمار دەکەن و شۆفێری سه‌رپێچیكار سزا ده‌درێت.
ئەمڕۆ یەکشەممە، به‌ڕێوه‌به‌رایه‌تی هاتوچۆی سلێمانی لە راگەیاندراوێکدا ئاماژەی بەوەکردووە، پاش ئەوەی کامێراکانی خاڵ بۆ خاڵ ماوەی هەفتەیەکە لە سەر ڕێگای سلێمانی- دوکان بەشێوەی تاقیکاری کار دەکەن سبەی دووشەممە سەرپێچی تۆمار دەکەن.
ئەوەشی خستووەتەڕوو، "داواكارین شوفێران پابه‌ندبن به‌و خێراییه‌ی له رێگاكه
دیاریكراوه و کامێراکان سەرپێچی تۆماردەکەن و شۆفێری سەرپێچیکار سزا دەدرێت."
پێشتر، بەڕێوەبەری راگەیاندنی
هاتووچۆی سلێمانی بە ئێن ئاڕ تی رایگەیاند، بە بڕیاری وەزارەتی ناوخۆ لە دەرەوەی
شاری سلێمانی ٢٢٥ کامێرای خاڵ بۆ خاڵ دادەنرێت و لە ناوشاردا ئەو سیستەمە جێبەجێناکرێت
و لە هەفتەی رابردووشدا بەشێوەی تاقیکاری ئەو کامێرایانە لە رێگای سلێمانی- دوکان
خرانە کار.
دواتریش، بەڕێوەبەری راگەیاندنی
هاتوچۆی سلێمانی رایگەیاند، تەنها لە یەک رۆژدا کامێراکانی خاڵ بۆ خاڵی سەر رێگای
تاسلوجە – دوکان ٣٨٥ هەزار حاڵەتی تیژڕەوییان تۆمارکردووە.
هاوکات، کۆمەڵێک لە هاوڵاتیان
و چالاکانى مەدەنى لە ناحیەى پیرەمەگرون، لە دژى دانانى کامێراکانى خاڵ بۆ خاڵ (پۆینت
تو پۆینت) گردبوونەوە و داوای لابردنی کامێراکانیان کرد.