ناسڕ ئەسەدی ئاماژەی بەوەش کرد، نەخشەی ئابوری لە ناوچەکە بریتییە لە ئاڵوگۆڕێکی بازرگانی گرنگ لە نێوان رۆژهەڵات و رۆژئاوا و عێراقیش دەبێتە بەشێکی گرنگی ئەو نەخشەیە.

ئەوەشی خستەڕوو، ئەو وڵاتانەی بۆ دەستپێکی جێبەجێکردنی پڕۆژەی رێگای گەشەپێدان بانگهێشت کراون ئامادەی کۆنگرەکەی وەزارەتی گواستنەوەی عێراق دەبن و کە لە رۆژی شەممە بەڕێوە دەچێت و وتیشی، "ئەنجوومەنی هەماهەنگی کەنداو ئامادەیی دەبێت."

باسی لەوەش کرد، پڕۆژەی رێگای وەبەرهێنان ١٠٠ هەزار وەک هەنگاوی سەرەتا ١٠٠ هەزار هەلی کار دەرەخسێنێت و لە دوای جێبەجێ کردنی ئەگەری هەیە یەک ملیۆن هەلی کار بڕەخسێنێت.

ئەوە لە کاتێک دایە، وەزارەتی گواستنەوەی عێراق ئاماژەی بەوەکرد، ڕێگای گەشەپێدان، بڕیارە لە ساڵی ٢٠٢٨ بخرێتە بواری جێبەجێ کردنەوە، کە درێژییەکەی ١٢٠٠ کیلۆمەترە و شەمەندەفەرەکانی کارەبایی دەبن و بە تەکنەلۆژیای نوێ کار دەکات و بە ١٠ پارێزگای هەرێمی کوردستان و عێراق دا گوزەر دەکات.

هەروەها کۆمپانیای گشتی هێڵی ئاسنینی سەر بە وەزارەتی گواستنەوەی عێراق رایگەیاند، "کۆی تێچووی پڕۆژەی رێگای گەشەپێدان ١٧ ملیار دۆلارە، چونکە تێچووی راکێشانی هێڵی ئاسنین ١٠,٥ ملیار دۆلارە و ٦,٥ ملیار دۆلاریش بۆ دروست کردنی رێگای خێرا تەرخان دەکرێت".