مەسرور بارزانی سەرۆکی حکومەتی ماوەبەسەرچووی هەرێم لە راگەیاندراوێکدا باسی لەوە کردووە، لە کۆبوونەوەکەدا بڕیاری کۆبوونەوەی هەفتەی ڕابردووی ئەنجومەنی وەزیرانی ماوەبەسەرچوو خراوەتەڕوو، کە تێیدا بە کۆی دەنگ بڕیاری ڕێکخستنەوەی دارایی گشتی لە سەرتاسەری هەرێم پەسەند کرا.

ئەوە لە کاتێکدایە، دوای ئەوەی دوێنێ جێگری سەرۆکی پەرلەمان بڕگەیەکی بۆ دانیشتنی ئەمڕۆی پەرلەمان زیادکرد کە کاراکردنەوەی کۆمیسیۆنی هەڵبژاردنەکان بوو، ئەمڕۆ بەهۆی ناڕازیببونی فراکسیۆنی یەکێتیەوە گرژی دروستبوو.

سەرۆکی پەرلەمان لە فراکسیۆنی یەکێتی لە سەرەتای دانیشتنەکەدا رایگەیاند، ئەو کارە ناپەیڕەوانەیە و دانیشتنەکەی دواخست. و سەرۆکایەتی پەرلەمانی کوردستان رایگەیاند، بەپێی پەیڕەوی ناوخۆی پەرلەمان، دەسەڵاتی دانیشتنی پەرلەمان و کردنەوەی دانیشتن و دواخستنی دانیشتنەکان لە دەسەڵاتی سەرۆکی پەرلەماندایە و لەبەر ئەوە دوای دواخستنی، دانیشتنی ئەمڕۆ هیچ بەهای یاسای و پەیڕەوی نابێت.

لایخۆشیەوە، سەرۆکی فراکسیۆنی پارتی لە پەرلەمان لە کۆنگرەیەکی رۆژنامەوانیدا رایگەیاند، بە دەنگی ٥٨ پەرلەمانتار کۆمیسیۆنی باڵای هەڵبژاردنەکان کارا کراوەتەوە.

هاوکات هیمداد شاهین، وتەبێژی جوڵانەوەی نەوەی نوێ رایگەیاند، ٣٢ ساڵە نەبینرا پەرلەمانتارەکانی یەکێتی و پارتی لەسەر مافی خەڵک لە پەرلەمان شەڕ بکەن، کەچی ئێستا هەریەکە لەو دوو حیزبە لەسەر ئەندامی یەک کۆمسیۆن کردویانە بە هەرا.