هاوکات، سەرۆکی ئەمریکا پاکێجێکی نوێی هاوکاری سەربازیی بۆ ئۆکرانیا بە گوژمەی ٣٧٥ ملیۆن دۆلار راگەیاند. وتیشی، "پشتیوانی ئۆکرانیا دەکەین و جێی ناهێڵین".

لایخۆشیەوە زیلینسکی لە تویتێکدا دەڵیت، لە میانی لووتکەی جی حەوتدا لەگەڵ بایدن کۆبووەتەوە و سوپاسی سەرۆکی ئەمریکای کرد بۆ ئەو ٣٧ ملیار دۆلار پشتیوانی دارایی و ئەو ٣٧٥ ملیۆن دۆلار هاوکارییە سەربازییەی پێشکەشی وڵاتەکەی کردووە.

ئاماژەی بەوەش کرد، بایدن بڕیاریداوە پشتیوانی هاوپەیمانی ئاسمانیی نێودەوڵەتیی ئۆکرانیا بکات و لە کۆبوونەوەکەیاندا گفتووگۆیان لەسەر پڕۆژەکانی بنیاتنانەوەی ئۆکرانیا و زیادکردنی هەماهەنگییەکان بۆ بەهێزکردنی توانای سەربازیی وڵاتەکە و جێبەجێکردنی هاوکێشەی ئاشتی ئۆکرانیا کردووە.

راشیگەیاند، لە کۆبوونەوەکەدا باس لە بەئەندامبوونی ئۆکرانیا لە هەمەهەنگییەکانی نێوان ئەورووپا-ئەتڵەس و لووتکەی ناتۆ لە ڤیلینوسی پایتەختی لیتوانیا و گرتنەبەری دڵنیایی ئەمنی بەرلە ئەندامێتی ئۆکراینا لە رێکخراوی ناتۆ کراوە.

ئەمەش لە دوای ئەوەدێت، لە ماوەی زیاتر لە ساڵێک جەنگ جۆ بایدنی سەرۆکی ئەمریکا و ڤۆلۆدیمیر زیلینسکی سەرۆکی ئۆکرانیا سێ جار چاویان بەیەک کەوتووە و ئەمریکا بەردەوام باس لەوەدەکات خۆی و هاوپەیمانەکانی پاڵپشتی سەروەری خاکی ئۆکرانیا دەکەن.