سودانی لە وتارەکەیدا باسی لەوەکرد، عێراق گەورەترین قوربانی لەپێناو ناوچەکە و جیهانیشدا داوە بۆ رووبەڕووبوونەوەی تیرۆر و کاتێک تیرۆرێکی رێکخراو هەڕەشەی لە جیهان دەکرد عێراق توانی بەسەریدا سەربکەوێت و ئاشتی و ئاسایش بۆ گەلەکەی و جیهان بگەڕێنێتەوە.

ئەوەشی خستەڕوو، "پێویستە لەسەرمان هەڵوێستمان سەبارەت بە کاریگەرییەکانی گۆڕانی کەشوهەوا و کەمی ئاو بەگوێرەی یاسانێودەوڵەتییەکان یەکبخەین، چونکە ئەم بابەتە پێویستی بە کاری پێکەوەیی هەیە هەتا بتوانین لەڕەگەوە چارەسەری بکەین و کاریگەرییە نەرێنییەکانی ئەم هەڕەشە مەترسیدارە کەم بکەینەوە."

باسی لەوەشکرد، عێراق هەر لە سەرەتاوە پشتگیری و پاڵپشتی گەڕانەوەی سوریای بۆ ناو کۆمکاری عەرەبی کردووە، چونکە گەڕانەوەی سوریا بۆ ناو کۆمکارەکە دەبێتەهۆی گەڕانەوەی ئاشتی و سەقامگیری لە ناوچەکەدا.

وتیشی، جەخت لە هەماهەنگی و کاری پێکەوەیی لە نێوان وڵاتانی عەرەبیدا دەکەنەوە و ئەرکی وڵاتانی عەرەبییە سودان لەو رووبەڕووبوونەوانە رزگار بکەن کە بەرۆکی ئەو وڵاتەی گرتووە و پێشوازی لە هەر هەنگاوێک دەکەن بۆ کۆتاییهێنان بە ناکۆکیەکان لەو وڵاتەدا.

ئاماژەی بەوەشکرد، عێراق بەگەرمی پێشوازی لە رێککەوتنی نێوان سعودیە و ئێران دەکات و پێیوایە هەنگاوێکی گرنگە و لە سەرەتاوە عێراق پشتیوانی و پاڵپشتی ئەو رێککەوتنەی کردووە، چونکە رێککەوتنی نێوان ئەم دوو وڵاتە دراوسێیە خزمەت بەبەرژەوەندییەکانی وڵاتانی ناوچەکە و سەقامگیری ناوچەکە دەکات.