PM:10:04:18/05/2023
1624 جار خوێندراوەتەوە
جێگری سەرۆکی لیژنەی دارایی پەرلەمانی عێراق رایگەیاند، پڕۆژە یاسای بوودجە ٦٧ هەزار ناونیشانی خاوەن بڕوانامە لە خۆ دەگرێت و لە رێگەیەوە خاوەن بڕوانامە باڵاکان لە بەڕێوەبەرایەتی و وەزارەتەکانی دەوڵەت دادەمەزرێندرێن.
ئیخڵاس دلێمی جێگری سەرۆکی لیژنەی دارایی پەرلەمانی عێراق، بە میدیاى عێراقى راگەیاند "بوودجەی ئەمساڵ هەلى بۆ چەند پلەیەکى فەرمانبەرى دەوڵەت لە خۆ گرتووە و ژمارەیان ٦٧ هەزار پلەیە و تایبەتە بە دامەزراندنی هەڵگری بڕوانامە باڵاکان و پلە بەندی پزیشکی و زانستی و فەرمانبەرانی گرێبەست.
ئاماژەی
بەوەش کرد، ئێستا ژمارەیەکی زۆر دامەزرێندراون و لە ساڵانی رابردوو گرنگییەکی
ئەوتۆ بە دامەزراندن نەدراوە و لە کاتی دامەزراندنیشدا جیاکاری کراوە لە نێوان
خاوەن بڕوانامەکان و بێ بڕوانامەکان.
ئەوەشی
خستەڕوو، لە رێگەی چەند پلەیەکی فەرمانبەرى دەوڵەتەوە، سەرنجی خاوەن بڕوانامە
باڵاکان رادەکێشرێت و لە وەزارەت و بەڕێوەبەرایەتی و دامەزراوەکانی دەوڵەت
دادەمەزرێندرێن و سوودیان لێ وەردەگیرێت.
ماوەی
چەندین ساڵە عێراق لە قەیرانی کار لە کەرتی گشتی و تایبەتیدایە و ئەوەش بووەتە هۆی
بەرز بوونەوەی رێژەی بێکاری لە نێو خاوەن بڕوانامە باڵاکان و دەرچوان لە بوارە
جیاوازەکان، جگە لە بێکاریی زۆربەی کرێکارەکانی پیشە جیاوازەکان.
