بەگوێرەی دوایین ئامارەکان لە عێراقدا، لە مانگی نیساندا نزیکەی پێنج هەزار حاڵەتی جیابوونەوەی هاوسەران تۆمارکراوە.
بەپێی دوایین ئەو ئامارانەی لەلایەن دادگاکانەوە بڵاوکراونەتەوە رێژەی جیابوونەوەی هاوسەران لە عێراق لە ئاستێکی بەرزدایە و تەنها لە مانگی نیسانی رابردوودا چوار هەزار و ٦٤٣ حاڵەتی جیابوونەوەی هاوسەران تۆمارکراوە.
بەرزی رێژەی
ئامارەکان بە جۆرێکە هەموو کاتژمێرێک شەش هاوسەر کۆتایی بە گرێبەستی هاوسەرییان دەهێنن
و جیادەبنەوە. ئەوەش لەکاتێکدایە، ئامارەکان تەنها تایبەتن بە پارێزگاکانی عێراق و
هەرێمی کوردستان هەژمار نەکراوە.
لە مانگی نیسانی
رابردوودا ١٤ هەزار و ٧٨٦ گرێبەستی هاوسەرگیری لە دادگاکانی عێراق تۆمارکراوە و
دوو هەزار و ٣١٩ گرێبەستی هاوسەرگیری لە دەرەوەی دادگا تۆمارکراوە. کە بەرزترین رێژەی
گرێبەستی هاوسەرگیری لە پارێزگای نەینەوا بووە و گەیشتووەتە هەزار و ٦٧٩ حاڵەت و
نزمترین رێژەش بە ٥٤٠ حاڵەت لە پارێزگای قادسییە تۆمار کراوە.
ئەمەش لەکاتێکدایە،
رێژەی جیابوونەوە و هەڵوەشاندنەوەی گرێبەستی هاوسەران لە دەرەوەی دادگا سێ هەزار و
٣١٧ حاڵەتی تۆمارکراو هەیە و هەزار و ٣٢٦ حاڵەت لەناو دادگا یەکلایی کراوەتەوە و کۆی
گشتی رێژەکەش گەیشتووەتە چوار هەزار و ٦٤٣ حاڵەت.
هاوکات، زۆرترین
رێژەی جیابوونەوەی هاوسەران لە پارێزگای بەسرە تۆمارکراوە و گەیشتووەتە ٤٦٦ حاڵەت
و کەمترین رێژەش لە پارێزگای زیقار بە ٨٢ حاڵەت تۆمارکراوە.