دوای یەکێتی ئەوروپا ئەمریکاش هەڵوێستی خۆی لەبارەی گەڕانەوەی رژێمەکەی بەشار ئەسەد بۆناو کۆمکاری عەرەبی راگەیاند و دەڵێت، بڕیارەکە بە گونجاو نازانن.
ڤیدانت پاتێل جێگری وتەبێژی وەزارەتی دەرەوەی ئەمریکا رایگەیاند، ئەو بڕیارە گونجاو نییە، بەڵام وڵاتانی عەرەبی لە چەندین ئەولەوییاتدا هاوبەشن بەتایبەتی لە چارەسەری سیاسی بۆ قەیرانی سوریا و گەڕانەوەی ئاوارەکان بۆ زێدی خۆیان.
وتیشی، "پێمانوانییە
کە لە ئێستادا دووبارە قبوڵکردنی سوریا لە کۆمکاری وڵاتانی عەرەبی گونجاو بێت و بەڕوونی
ئەم خاڵەمان لەگەڵ سەرجەم هاوبەشەکانمان باسکردووە".
ئاماژەی بەوەشکرد،
لەگەڵ ئەوەشدا لە چەندین ئامانجدا لەگەڵ وڵاتانی عەرەبی سەبارەت بە پرسی سوریا بەشدارن
و لە نێو ئەمانەشدا بریاری ژمارە ٢٢٥٤ی نەتەوەیەکگرتووەکان سەبارەت بە دۆزینەوەی
چارەسەری گونجاو بۆ قەیرانی سوریا لە سەرووی هەموویانەوە دێت.
باسی لەوەشکرد،
لەگەڵ وڵاتانی عەرەبیدا لە بابەتەکانی گەیاندنی هاوکاریی مرۆیی بۆ سوورییەکان و رێگریکردن
لە دووبارە سەرهەڵدانەوەی رێکخراوی داعش و ئامانجەکانی ئاسایش و سەقامگیری هەمان
ئامانجیان هەیە.
ئەوەش لە
کاتێکدایە، دوێنێ، دوای بڕیاری گەڕانەوەی رژێمی بەشار ئەسەد لە سوریا بۆ کۆمکاری عەرەبی،
یەکێتیی ئەوروپا هەڵوێستی خۆی دووپاتکردەوە و رایگەیاند، بەبێ چارەسەری سیاسیی،
ئاساییکردنەوەی پەیوەندییەکانی لەگەڵ رژێمی ئەسەد مەحاڵە.