لە ئاهەنگێکی تایبەت لە ئەنقەرەی پایتەخت بە بەشداری ئەندامانی سەرکردایەتی شەش حزبە ئۆپۆزسیۆنەکەی تورکیا کارنامەی حکومی راگەیەنرا کە لە ٢٤٠ پەڕە پێکدێت.

گرنگترین ناونیشانی ناو کارنامەکە بریتین لە: ماف و دادپەروەری و دادوەری، کەرتی گشتی، بەرەنگاربوونەوەی گەندەڵی، چاودێری و شەفافیەت، دامەزراندن، زانست و پەرەپێدان، گۆڕینی دیجیتاڵی، فێرکردن، سیاسەتە کۆمەڵایەتییەکان، سیاسەتی دەرەکی.

کارنامەی حکومی ئۆپۆزسیۆنی تورکیا هەڵگری ناونیشانی جۆراوجۆرن لە ناویاندا فرۆشتنی فرۆکەکانی سەرۆکایەتی و نیشتەجێکردنی سەرۆککۆماری تورکیا لە کۆشکی سەرۆکایەتی پێشوو کە ناوی "شنکایایە" لە ئەنقەرە.

ناونیشانی یەکەمی کارنامەکە ماف و دادپەروەری و دادوەرییە و چەند خاڵیک لە خۆدەگرێت، گرنگترینیان گواستنەوەی سیستەمی پەرلەمانی و پتەوکردنی دەسەڵاتەکانی پەرلەمان بە تایبەتی دەسەڵاتی چاودێری و بەدەستخستنەوەی دەسەڵاتەکان لە سەرۆککۆمارەوە، لە ناویاندا رێککەوتنە نێودەوڵەتییەکان.

لە ناونیشانەکانی دیکەی کارنامەی حکومەتی ئۆپۆزسیۆنی تورکیا ئەوەش هاتووە، دەسەڵاتەکانی سەرۆککۆمار لە راگەیاندنی مەراسیمەکانی کۆماری تورکیا هەڵدەوەشێنرێنەوە و ماوەی حوکمڕانی کردن حەوت ساڵ دەبێت و هەموو پەیوەندییەکانی لەگەڵ حزبەکەیدا دەپچڕێنێت لەو ماوەیەدا و لە دوای کۆتایی هاتنی حوکمڕانی هیچ کارێکی سیاسی ئەنجامنادات.

ناونیشانێکی دیکە بریتییە لە، چاودێری و بەرەنگاربوونەوەی گەندەڵی، بۆ ئەو مەبەستەش لیژنەی گەندەڵی لە پەرلەمان پێکدەهێنرێت و هەوڵی سنووردارکردنی بە قاچاخبردنی پارە بۆ درەوەی وڵات دەدرێت و رێکخراوێک دادەمەزرێنرێت بۆ بەدواداچوون و گەڕاندنەوەی پارەی بەقاچاخبراو و کارکردن تاوەکو بە خێرایی تورکیا لە لیستی رەشی وڵاتان بهێنرێتە دەرەوە.

ئۆپۆزسیۆنی تورکیا کار دەکات بۆ کەمکردنەوەی فرۆکە تایبەتییەکانی سەرۆکایەتی تورکیا و راگرتنی پڕۆژەی کەناڵی ئاوی ئەستەنبوڵ و تەرخانکردنی پارەی ئەو پڕۆژەیە بۆ پڕۆژەی کشتوکاڵی جیاواز و رەخساندنی هەلی کار بۆ گەنجان و ژنان.

هاوکات، پرسی چارەسەرکردنی کێشەی کورد لە کارنامەی ئۆپۆزسیۆنی تورکیا هیچ ئاماژەیەکی پێنەدراوە، لەکاتێکدا، ئۆپۆزسیۆن بۆ سەرکەوتنی پشت بەدەنگی کوردە دەبەستێت و لەم هەڵبژاردنەدا دەنگی کورد یەکلاییکەرەوە دەبێت.

ئەمە لەکاتێکدایە، "هاوپەیمانی گەل" کە بە هاوپەیمانی "شەش قۆڵی"یش ناسراوە و بەهێزترین هاوپەیمانی ئۆپۆزسیۆنی تورکیایە و بە توندی ململانێ لەگەڵ ئەردۆغان دەکات و لە هەریەک لە پارتەکانی گەلی کۆماری و نوێ و ئایندە و سەعادەت و دەوا و پارتی دیموکراتی گەلان "هەدەپە" پێکهاتووە. سەرجەم پارتە ئۆپۆزسیۆنەکان داوای گەڕانەوە بۆ سیستمی پەرلەمانی دەکەن و کەمال کلیچدار ئۆغلۆ سەرۆکی پارتی گەلی کۆماری کاندیدیانە بۆ پۆستی سەرۆککۆماری تورکیا لە هەڵبژاردنەکاندا.

بڕیارە لە ١٤ـی ئایاردا هەڵبژاردنی پەرلەمان و سەرۆکایەتی تورکیا بەڕێوەبچێت و ٦٤ ملیۆن و ١١٣ هەزار و ٩٤١ دەنگدەر مافی دەنگدانیان هەیە و لەو ژمارەیەش سێ ملیۆن و ٤١٦ هەزار و ٦٧١ دەنگدەر لە دەرەوەی وڵات مافی دەنگدانیان هەیە و لە کۆی گشتی دەنگدەرانیش پێنج ملیۆن و ٢٠٠ هەزار دەنگدەری نوێ بەشداری دەکەن کە یەکەمجارە دەنگ دەدەن.

لە تورکیا بۆ هەڵبژاردنی سەرۆککۆماری نوێ پێویستە کاندید زیاتر لە ٥٠٪ی دەنگی دەنگدەران بەدەستبهێنێت و بۆ دەرچوونی پارتەکانیش سیستمی "هۆندت" پەیڕەو دەکرێت کە تیایدا پێویستە هەر پارتێک بەربەستی ٧٪ تێپەڕێنێت تا بتوانێت بچێتە پەرلەمانەوە.