وەزیری دەرەوەی چین رایگەیاند، پەکین ئامادەیە بەشداری راستەقینەبکات لە چارەسەرکردنی سیاسیانەی قەیرانی ئۆکرانیا و بە ئەو مەبەستەش ئامادەیە کار لەگەڵ مۆسکۆدا بکات.
چین گانگ وەزیری دەرەوەی چین لە چوارچێوەی دیدارێکیدا لەگەڵ سێرگی لاڤرۆڤ هاوتا روسییەکەی ئاماژەی بەوەدا، چین بە بەردەوامی کاردەکات لەسەر بەهێزکردن و پاڵپشتی کردنی دانوستانەکانی ئاشتی.
وتیشی، "ئێمە ئامادەین بەشداری راستەقینەبکەین لەچارەسەرکردنی
قەیرانی ئۆکرانیا بە شێوازی سیاسییانە لە رێگەی پەیوەندیکردن و هەماهەنگی کردن
لەگەڵ روسیادا".
لەلایەن خۆشییەوە وەزارەتی دەرەوەی چین راگەیەنراوێکی بڵاوکردەوە و
تیایدا هاتووە، هەردوو لا رێککەوتوون لەسەر پتەوتر کردنی هەماهەنگی نێوانیان
لەچەندین ئاست لەوانەش برێکس و کۆمەڵەی بیست و نەتەوەیەکگرتووەکان و رێکخراوی
شەنگەهای بۆ هاریکاری.
دەشڵێت، چین و روسیا رێککەوتوون بەهەموو شێوەیەک رووبەڕووی سەپاندنی
هەموو جۆرەکانی هەژموون ببنەوە.
ئەمە لەکاتێکدایە، لە مانگی ئازاری رابردوو حکومەتی چین دەستپێشخەرییەکی
بۆ چارەسەرکردنی ناکۆکی و جەنگی نێوان روسیا و ئۆکرانیا راگەیاند کە لە ١٢
خاڵ پێکهاتبوو بە ئامانجی چارەسەرکردنی کێشەکان بەشێوەی سیاسی و دبلۆماسییانە کە
تیایدا داوای لە روسیا و ئۆکرانیا کردبوو
جەنگی نێوانیان رابگرن و دەست بە گفتوگۆکانیان بکەن.