ئاماژەی بەوەشداوە، لەم قۆناغەشدا هاوردەکردنی دیزڵ (گازوایل)، بەڕێژەی ٢٦.٤٪ زیادی کردووە و گەیشتووەتە ٨٤٨ هەزار و ٢٦٩ تەن و بەشەکانی دیکەی بەرهەمە هاوردەکراوەکانیش تایبەتن بە سووتەمەنی جۆرەکانی فڕۆکە و کەشتی، بەنزین و جۆرەکانی رۆنی ئۆتۆمبێل.

راپۆرتەکە ئەوەشی خستووەتەڕوو، هاوردەکردنی بەرهەمە نەوتییەکان لە مانگی شوباتدا بەراورد بە مانگی شوباتی ساڵی رابردوو بەڕێژەی ٥.٦٪ زیادیکردووە و گەیشتووەتە سێ ملیۆن و ٢٢٥ هەزار و ٨٨٦ تەن.

هەربەگوێرەی راپۆرتی "کەرتی بازاڕی نەوت"ی دەزگای رێکخستنی بازاڕی وزەی تورکیا، زۆرترین بڕی بەرهەمە نەوتییەکانیش کە یەک ملیۆن و ٦١٥ هەزار و ٥٥١ تەنە لە روسیاوە هاوردە کراوە، دوای ئەویش عێراق بە ٦١٠ هەزار و ٢١٦ تەن لە ریزبەندی دووەمدا دێت و بە دواشیدا کازاخستان بە ٣٦٢ هەزار و ٣٤١ تەن لە پلەی سێیەمی ئەو وڵاتانەدایە کە تورکیا زۆرترین بەرهەمی نەوتی لێوە هاوردە کردوون.

هەربەگوێرەی راپۆرتەکە، لە بەرامبەردا هەناردەکردنی بەرهەمە نەوتییەکان لە تورکیاوە بەڕێژەی ٣.٩٪ کەمیکردووە و گەیشتووەتە ٨١٤ هەزار و ٧٦٩ تەن.

ئەوەشخراوەتەڕوو، زۆرترین بەشی ئەو زیادبوونەش تایبەتە بە هەناردەکردنی سووتەمەنییەکانی فڕۆکە کە لە مانگی شوباتدا بەراورد بە هەمان مانگی ساڵی رابردوو بەڕێژەی ٤٪ زیادیکردووە و گەیشتووەتە ٣٠٠ هەزار و ٤٦٣ تەن.

دەشڵێت، هەر لەو قۆناغەشدا هەناردەکردنی سووتەمەنی دەریاوانی بەڕێژەی ٤٢.٦٪ کەمیکردووە و گەیشتووەتە ٧٩ هەزار و ٦٢٣ تەن.

هەروەها، بەهەمان شێوەش هەناردەکردنی جۆرەکانی بەنزین بەڕێژەی سەدا ٨٩.٩٪ کەمیکردووە و گەیشتووەتە شەش هەزار و ٨٢١ تەن.

لە بەرامبەریشدا هەناردەکردنی دیزڵ (گازوایل) بەڕێژەی ١١٤٪ زیادیکردووە و گەیشتووەتە ٢٥١ هەزار و ٧٢١ تەن.