باسی لەوەشکرد، حکومەتی ماوەبەسەرچووی هەرێم بۆ ئەمساڵ و ساڵی داهاتووش ناتوانێت قەرزەکانی بداتەوە، بەڵام ئەگەر لەو بەشەبودجەیەی لە بەغداوە بۆی دێت بڕەکەی زیاتر بێت، رەنگە بتوانێت بە پلانێکی رێکخراو قەرزەکانی بداتەوە. دەشڵێت، ئەگەر بەغدا هاوکاری نەکات، هەرێم ناتوانێت قەرزەکانی بداتەوە.

راشیگەیاند، تاوەکو ئێستا هیچ خشتەیەکی روون و ئاشکرا نییە کە هەرێم ئەو قەرزانە دەداتەوە یان چۆن دەیداتەوە، ئەوەشی خستەڕوو، بەشێکی قەرزەکان سویان ئەوەندە زۆرە بوونەتە فشار لەسەر هەرێم.

لە ساڵی ٢٠١٤دا حکومەتی هەرێم ئابوری سەربەخۆی راگەیاند و دەستی کرد بە فرۆشتنی سەربەخۆی نەوت.

دواتر لە ٢٥ـی ئازاری ئەمساڵدا، وەزارەتی نەوتی عێراق رایگەیاند، سکاڵایەکی دادگای پاریسی لەسەر دۆسیەی نایاسایی بوونی هەناردەی نەوتی هەرێم بۆ تورکیا بردووەتەوە. دواتریش هەناردەکردنی نەوتی هەرێم بۆ تورکیا راگیرا.

بەرەبەیانی رۆژی ١٥ی شوباتی ساڵی رابردوو، دادگای فیدڕاڵی عێراق دانیشتنی خۆی لەبارەی دۆسییەی ٥٩ی فیدڕاڵی تایبەت بە هەناردەکردنی نەوت لەلایەن حکومەتی هەرێمەوە بۆ دەرەوەی وڵات بەبێ رەزامەندی حکومەتی فیدڕاڵی سازکرد.دواتر رایگەیاند، یاسای نەوت و غازی هەرێمی کوردستان و فرۆشتنی نەوت لەلایەن حکومەتی هەرێمەوە نادەستورییە.

هـ.ئـ