وتیشی، هەردوو وڵات ئیرادەی پتەوی خۆیان راگەیاندووە بۆ ئەوەی هەموو هەوڵێک بدەن بۆ بەرزکردنەوەی ئاشتی و ئاسایشی ناوچەیی و نێودەوڵەتی لە چوارچێوەی جێبەجێکردنی رێککەوتنی گشتی هاوکاریی ئابوری و بازرگانی و وەبەرهێنان.

وەزیری رێگاوبان و دروستکردنی شارەکانی ئێران ئەوەشی خستەڕوو، لەم روانگەیەوە بەمەبەستی بەرزکردنەوەی هاوکارییەکان، گەشتە ئاسمانییەکانی نێوان ئێران و سعودیە ده‌ستپێده‌كەنەوە‌، جگە لەو گەشتانەی کە بۆ حەج دیاریکرابوون.

ئاماژەی بەوەشدا، دەسەڵاتی فڕۆکەوانی سەر بە وەزارەته‌كه‌ی هەموو هەوڵێک دەدات بۆ بەڕێوەبردنی گەشتە ئاسمانییەکانی نێوان ئێران و سعودیە.

دوێنێ ٢٢ی ٤ی ٢٠٢٣ عەبدولفەتاح نەواب نوێنەری عەلی خامنەیی رابەری باڵای ئێران رایگەیاند، ئێران و سعودیە لە گفتوگۆکانیان بۆ دەستپێکردنەوەی گەشتەکانی عەمرە بەردەوامن.

رۆژی هەینی رێکەوتی ١٠ی ٣ی ٢٠٢٣ شەمخانی سکرتێری ئەنجومەنی باڵای ئاسایشی نیشتمانی ئێران و موسەید بن محەمەد ئەلعەیبان وەزیری دەرەوەی سعودیە و فانگ یی ئەندامی مەکتەبی سیاسی کۆمیتەی ناوەندی حزبی شیوعی چین لە پەکینەوە راگەیاندراوێکی هاوبەشیان لەبارەی رێککەوتنی سعودیە و ئێران بڵاوکردەوە.

بەپێی راگەیندراوەکە، ئەو دەستپێشخەرییە لەسەر داوای شی جین پینگ سەرۆکی چین بووە و پاڵپشتی لێکنزیکبوونەوەی ئەو دوو وڵاتە و خواستی هەردوو وڵاتی لەسەر چارەسەرکردنی کێشە و ناکۆکییەکان کردووە.

ئەمەش دوای ئەوەدێت سعودیه‌ ٢ی كانوونی دووه‌می ٢٠١٦ به‌تۆمه‌تی تیرۆر ٤٧ كه‌سی له‌سێداره‌دا كه‌ زانای ئایینی شیعه ‌مه‌زهه‌بیان لە نێودا بوو و دوای ئه‌وه‌ش به‌رپرسانی ئێران به‌ دوای یه‌كدا كاردانه‌وه‌یان به‌رامبه‌ر سعودیه‌ ده‌ربڕی، دواتر ئاگر به‌ردرایه‌ باڵیۆزخانه‌ی سعودیه‌ له‌ تاران و كۆنسوڵخانه‌ی سعودیه‌ له‌ مه‌شهه‌د.

ئەو دوو وڵاتە لە ماوەی رابردووشدا چەندان جار لە عێراق کۆبوونەوە بە مەبەستی رێککەوتن و ئاماژەیان بەوەدا نزیک بوونەتەوە لە رێککەوتن.