ئاژانسەکە ئەوەشی خستووەتەڕوو، بەرپرسێکی باڵای وەزارەتی دەرەوەی ئەمریکا لە رێگەی پەیوەندییەکی تەلەفۆنییەوە بە رۆژنامەنووسانی راگەیاند، پەیامەکە لە نێو وڵاتانی کۆمەڵەی حەوتدا هەمان شتە کە دەیانەوێت کار لەگەڵ چیندا بکەن لەو بوارانەدا کە چین ئامادەیە کاریان لەگەڵدا بکات.

وتیشی، "بە دڵنیاییەوە بە رووی هەر زۆرەملێیەک و یاریکردن بە بازاڕەکاندا دەوەستینەوە، بە رووی هەر هەوڵێکدا دەوەستینەوە بۆ گۆڕینی دۆخی هەنووکەیی تەنگەی تایوان."

هەروەها، دوابەدوای کۆبوونەوەی وەزیرانی دەرەوەی وڵاتانی کۆمەڵەی حەوت، یۆشیماسا هایاشی وەزیری دەرەوەی ژاپۆن رایگەیاند، "ئەو کاریگەرییەی ئاشتی و جێگیریی تەنگەی تایوان هەیەتی لەسەر وڵاتەکەمان دیاریکراوە، بەڵام فاکتەرێکی زۆر گرنگە لە پارێزراوی و ئاسایشی کۆمەڵگەی نێودەوڵەتیشدا."

ئەنالینا بێربۆک وەزیری دەرەوەی ئەڵمانیا ئاماژەی بەوەداوە، چین بە شێوەیەکی بەرچاو هەوڵ دەدات یاسا نێودەوڵەتییەکان بگۆڕێت بۆ یاساکانی خۆی.

ئەمە لەکاتێکدایە، لە ماوەی رابردوودا، ئیمانوێل ماکرۆن سەرۆکی فەڕەنسا سەردانی چینی کرد و لە کۆنفرانسێکی رۆژنامەنوسیدا هۆشداریدا دژی ئەوەی ئەوروپا رابکێشرێتە قەیرانێکەوە لەسەر تایوان کە بەهۆی شێوازی ئەمریکا یاخود کاردانەوەی زیادەڕۆیی چینەوە سەرچاوەی گرتبێت.