نوسینگەی راگەیاندنی پەرلەمانی عێراق ئاماژەی بەوەکردووە، دانیشتنی شەوی رابردوو بۆ خوێندنەوەی دووەمی پرۆژەیاسای بودجە بە کراوەیی دەمێنێتەوە و ئەمڕۆ بەردەوام دەبێت.
نوسینگەی راگەیاندنی پەرلەمانی عێراق لە راگەیاندراوێکدا ئەوەشی خستووەتەڕوو، دانیشتنی ئەمڕۆ دووشەممە درێژەپێدەری دانیشتنی دوێنێ یەکشەممە دەبێت.
شەوی رابردوو بە ئامادەبوونی
سەرۆکی پەرلەمان و ١٩٨ پەرلەمانتار دانیشتنی
پەرلەمانی عێراق بۆ خوێندنەوەی دووەمی پڕۆژە یاسای بودجە دەستیپێکرد.
لە ئێستادا خوێندنەوەی یاسایی
بۆ بودجەی ساڵەکانی ٢٠٢٣ و ٢٠٢٤ و ٢٠٢٥ بەڕێوەدەچێت و لە نێوان پەرلەمانتاران گفتگۆی
لەسەر دەکرێت.
بە گوێرەی زنیارییەکان
پشکی هەرێم لە بودجەی عێراق زیاد دەکرێت و شایستەی دارایی زیاتری بۆ دابین دەکرێت
و مووچەی پێشمەرگە لە بودجەی عێراق هەژمار دەکرێت.
بەپێی کارنامەکە لە چوارچێوەی
دانیشتنەکەی ئەمڕۆی ئەنجومەنی نوێنەراندا، خوێندنەوەی دووم بۆ پرۆژەیاسای بودجەی
گشتی بۆ ساڵانی ٢٠٢٣، ٢٠٢٤ و ٢٠٢٥، دەکرێت.
رۆژی ٢ی ئەم مانگە، موحسن
مەندەلاوی جێگری یەکەمی سەرۆکی ئەنجومەنی نوێنەرانی عێراق، پرۆژەیاسای بودجەی بۆ
ساڵانی ٢٠٢٣، ٢٠٢٤ و ٢٠٢٥ رەوانەی لیژنەی دارایی ئەنجومەنی نوێنەران کرد. لە ١٣ی
مانگی ئازاردا، ئەنجومەنی وەزیرانی عێراق، پرۆژەیاسای بودجەی پەسەند کرد و رۆژی ١٧ی
ھەمان مانگە رەوانەی ئەنجومەنی نوینەرانی کرد.
پێشتر باسم عەوادی وتەبێژی
حکومەتی عێراق رایگەیاندبوو، قەبارەی بودجەی عێراق بۆ ساڵی ٢٠٢٣، دەگاتە ١٩٧ تریلیۆن
و ٨٢٨ ملیار دینار و کورتھێنان لە بودجەی گشتیی ئەمساڵدا، ٦٣ تریلیۆن دینارە.