سەرۆکی روسیا رایگەیاند، پەیوەندییەکانیان لەگەڵ عێراق بەردەوام لە پەرەسەندندایە و روسیا لەو وڵاتە لە چەندین کەرتدا پرۆژەی هاوبەشی هەیە. دەشڵێت، "پاڵپشتی عێراقێکی سەربەخۆ و یەکپارچە دەکەین."
ئەمڕۆ چوارشەممە، ڤلادمێر پوتین سەرۆکی روسیا لە کۆشکی کرملین سیاسەتی نوێی دەرەوەی وڵاتەکەی واژۆکرد و پێشکەشی باڵیۆزی وڵاتانی دەرەوەی کرد و وتارێکی لەبارەی سیاسەتی نوێی وڵاتەکەی لەگەڵ جیهان پێشکەشکرد.
لەبارەی عێراقەوە سەرۆکی
روسیا ئاماژەی بەوەکرد، هاوکاری و پڕۆژەی هاوبەشیان لەگەڵ عێراقدا هەیە و ئاڵوگۆڕی
بازرگانی نێوان روسیا و عێراق لە ماوەی دوو ساڵی رابردوودا گەشەیەکی بەردەوامی بەخۆیەوە
بینیوە.
وتیشی، روسیا پشتیوانی
یەکپارچەیی عێراق و دەستێوەرنەدانی وڵاتانی دیکە لە کارووباری ئەو وڵاتە دەکات.
لێدوانەکانی پوتین لەبارەی عێراقەوە لە دوای ئەوەدێت، لە ٤ـی شوباتی
ئەمساڵدا سێرگی لاڤرۆڤ وەزیری دەرەوەی روسیا سەردانی عێراقی کرد و لەگەڵ هەر سێ سەرۆکایەتییەکەی عێراق و وەزیری دەرەوە
کۆبووەوە و باس لە گرنگی پەیوەندییە هاوبەشەکانی هەردوولا و دۆسیەی نەوت وزە کرد.
لە ماوەی رابردوودا ڤلادمێر
پوتین سەرۆکی روسیا واژووی لەسەر ستراتیژی نوێی سیاسەتی دەرەوەی وڵاتەکەی کردوو لە
ستراتیژییە نوێکەدا، ئەمریکا و رۆژئاوا وەک سەرچاوەیەکی هەڕەشە بۆ مۆسکۆ لە قەڵەم
دەدرێت.
لە سەرەتای جەنگی روسیا و
ئۆکرانیەوە پەیوەندییەکانی نیوان وڵاتانی رۆژئاوا و ئەمریکا لەگەڵ روسیا گرژی تێکەوت
و روسیا ئاماژەی بەوەدا، رۆژئاوا و ئەمریکا دەیانەوێت جەنگی ئۆکرانیا بەردەوام بێت،
ئەمریکا و وڵاتانی رۆژئاواش بەردەوامن لە سەپاندنی سزای ئابووری بەسەر روسیادا.