بەڕێوەبەری گشتی فەرمانگەی سامانی ئاژەڵی لەوەزارەتی کشتوکاڵی عێراق رایگەیاند، کۆی گشتی ژمارەی سامانی ئاژەڵی لە عێراقدا لە سەرەتای ساڵەوە هەتاوەکو ناوەڕاستی مانگی ئازار گەیشتووەتە ٢٠ ملیۆن و ٤٢٦ هەزار و ٤٨١ سەر ئاژەڵ.
وەلید محەمەد بەڕێوەبەری گشتی فەرمانگەی سامانی ئاژەڵی لەوەزارەتی کشتوکاڵی عێراق ئاماژەی بەوەکردووە، مەڕ پلەی یەکەمی گرتووە لە لیستی سامانی ئاژەڵی لە عێراقدا کە بریتییە لە ١٦ ملیۆن و ٥٢٠ هەزار و ٧٢٧ سەر.
دەشڵێت، لەو رێژەیەش پارێزگای نەینەوا خاوەندارێتی پێنج ملیۆن و ٢٧٠ هەزار
و ٨١٦ سەر مەڕ دەکات و دوای ئەویش پارێزگای ئەنبار بە پلەی دووەم دێت کە خاوەندارێتی
دوو ملیۆن و ٨٦٣ هەزار و ٦٠٢ سەر مەڕ دەکات.
باسی لەوەشکردووە، ژمارەی بزن لەعێراقدا گەیشتووەتە ملیۆنێک و ٣٦٠ هەزار
و ٧٤٢ سەر و پارێزگای نەینەوا لەرووی ژمارەی بزنەوە لە پلەی یەکەمدادێت کە خاوەندارێتی
٢٦٩ هەزار و ١٤٧ سەر بزن دەکات و پارێزگای ئەنبار لەپلەی دووەمدا دێت کە خاوەندارێتی
١٥٥ هەزار و ٨٠ سەر بزن دەکات.
وەلید محەمەد ئەوەشی خستەڕوو، ژمارەی مانگا لە سەرجەم پارێزگاکاندا ملیۆنێک
و ٨٧٧ هەزار و ٨٢٩ سەرە و پارێزگای زیقار بە هەبوونی ٢٨٩ هەزار و ٨٢٩ سەر لەپلەی یەکەمدا
دێت و پارێزگای بابل بە پلەی دووەم دێت کە خاوەندارێتی ٢٣٣ هەزار و ٥٠٠ سەر مانگا
دەکات.
وتیشی، ژمارەی گامێش لە تەواوی پارێزگاکاندا گەیشتووەتە ٤٦٢ هەزار و ٢٩١
سەر و پارێزگای بەغدا بەپلەی یەکەم دێت کە خاوەندارێتی ١٠٢ هەزار و ١٠٦ سەر گامێش
دەکات و پارێزگای بەسرەش بە پلەی دووەم دێت کە خاوەندارێتی ٩٢ هەزار و ٧٤٦ سەر گامێش
دەکات.
بەڕێوەبەری گشتی فەرمانگەی سامانی ئاژەڵی لەوەزارەتی کشتوکاڵی عێراق
ئاماژەی بەوەشدا، ژمارەی وشتر لە عێراقدا دەگاتە ٢٠٤ هەزار و ٨٩٤ سەر و پارێزگای
موسەنا بە هەبوونی ٢٧ هەزار و ٧٢٣ سەر لە پلەی یەکەمدا دێت و پارێزگای نەینەواش بەهەبوونی
٢٧ هەزار و ١٣١ سەر وشتر لە پلەی دووەمدا دێت.
ئەمە لەکاتێکدایە، لەماوەی رابردوودا بەرپرسانی حکومی هەرێم ئاماژەیان بەوەدابوو
کە هەرێم خاوەنی ژمارەیەکی زۆر مەڕ و بزن و مانگاو و ڕەشەوڵاخی تێدایە و سامانێکی
گرنگ و سەرمایەیەکی کشتوکاڵی گەورەیە و مایەی بژێوی ھەزارەھا خانەوادەیە، بەڵام
هاوشێوەی سێکتەرەکانی دیکە چونکە حکومەت ھیچ پاڵپشتیەکی ناکات بەرەو لەناوچوون و
مایە پوچ بوون دەچێت.