دواین ئامارەکان دەریدەخەن، بەهۆی بومەلەرزەکەی ٦ی شوباتەوە کە ناوچەکانی باکور و رۆژئاوای کوردستان و تورکیا و سوریای گرتەوە، تا ئێستا ٥٠ هەزار و ٣٠٣ کەس گیانلەدەستداوە.
وەزیری ناوخۆی تورکیا رایگەیاند، بەهۆی بومەلەرزەکەی ٦ی شوباتەوە لە باکوری کوردستان و تورکیا ٤٣ هەزار و ٥٥٦ کەس گیانیان لەدەستداوە و زیاتر لە ٦٠٠ هەزار یەکەی نیشتەجێبون و ١٥٠ هەزار بینای بازرگانی زیانیان بەرکەوتووە.
ئیدارەی فریاکەوتن و کارەساتە سروشتیەکانی
تورکیا ناسراو بە "ئافاد" بڵاویکردەوە، لە دوای یەکەم بومەلەرزەوە حەوت
هەزار و٢٤٢ پاشلەرزە ڕوویداوە، کە ٤١ بومەلەرزەیان لە نێوان ٥ بۆ ٦ پلەی رێختەر
بووە و٤٥٠شیان لە نێوان ٤تا ٥ پلەی رێختەر بووە.
هاوکات لە سوریاش رێژەی گیانلەدەستدان بەهۆی
بومەلەرزەکەوە بەرزبووەتەوە و روانگەی سوری بۆ مافەکانی مرۆڤ بڵاویکردەوە، بەهۆی
بومەلەرزەکەوە شەش هەزار و ٧٤٧ کەس گیانیان
لەدەستداوە.
لە لایەکی دیکەوە رێکخراوی تەندروستی جیهانی
پێشبینی دەکات تەرمێکی زۆر لە ژێر داروپەردووی باڵەخانەکاندا مابنەوە و راشیگەیاند
بەهۆی بومەلەرزەکەوە ٢٣ ملیۆن کەس زیانیان بەرکەوتووە.
لە بەرەبەیانی ٦ی شوبات بومەلەرزەیەک بەگوڕی
٧.٦ پلەی رێختەر باکور و رۆژئاوای کوردستان و بەشێکی تورکیا و سوریای هەژاند و بەهێزی
بومەلەزەکە بووە هۆی گیانلەدەستدانی زیاتر لە ٥٠ هەزار کەس و ئاوارە بوونی سەدان هەزار
خێزان سەرەڕای روخانی هەزاران باڵەخانە و زیانێکی زۆری مادی.
ک.ک
ل.ل