شاری هەولێر رۆژانە پێویستی بە ٤٠٠ تۆن غاز هەیە بەڵام ئێستا كەمتر لە ٣٠٠ تۆن غاز لە لاین كۆمپانیاوە بۆ هەولێر دابین دەكرێت كە ئەمەش وەكو پێویست بەشی پێداویستی هاوڵاتیان ناكات، چەند چاوگێک هۆکاری کەمی غاز لەبازاڕەکاندا دەگێڕنەوە بۆ ئەوەی لە غاز هەناردەی دەرەوە دەکرێت بە نرخێکی بەرزتر.

نەبەز عبدالحەمید قائیمقامی قەزایی ناوەندی هەولێر بە ئێن ئاڕ تی راگەیاند، ئەو برە غازەی لە لایەن ئەو كۆمپانیایەی كە غاز بۆ سەرجەم شارەكانی هەرێم دابین دەكات و گرێبەستی لەگەل وەزارەتی سامانە سروشتیەكان هەیە ئەو بڕەی بۆ هەولێری دابین دەكات وەكو پێویست نییە .

وتیشی، "ئەو برەشی دێت لە ژێر چاودێری دایە بۆ ئەوەی بە یەكسانی دابەش بكرێت."

هاوڵاتییەک دەڵێت، "لە هەندێک گەرەک هەیە بە هەشت و نیو بەڵام هەموو كات نییە ئەوەی دیكەش بە ١٥ هەزار دینارە بەس بەو نرخە گرانە پێویستە حكومەت چاودێری بكات چونكە بەو نرخە گرانە هەموو كەس پێ ناكرێت."

هاوڵاتییەکی دیکەش باسی لەوەکردووە، بەو نرخە غاز گرانە و كەسانی فەقیر لە توانیاندانیە بیكڕن، رەنگە بۆ خاوەن جێشخانەیەک ئاسانتر بێت بیكرێت بەلام بۆ كەسی كەم دەرامەت قورسە بەو نرخە بەرزە بیكرێت.

بەپێی داتا فەرمییەکان، هەرێمی کوردستان خاوەنی نزیکەی حەوت ترلیۆن مەتر سێجا گازی سروشتییە و لە پلەی هەشتەمی جیهاندایە بۆ یەدەگی غاز و لە ئێستاشدا گەورەترین کێڵگەی غازی هەرێم کە کۆرمۆرە لەلایەن کۆمپانیای دانە غازەوە وەبەرهێنانی تێدا دەکرێت، رۆژانەش نزیکەی ٤٥٠ هەزار پێ سێجا غازی سروشتی بەرهەمدەهێنێت، لەگەڵ ئەوەشدا نەبوونی سوتەمەنی یەکێکە لەو قەیرانانەی نۆ کابینەی یەک لە دوای یەکی حکومەتی هەرێم نەیانتوانیوە چارەسەرێکی ریشەیی بۆ بدۆزنەوە.