جۆ بایدن سەرۆکی ئەمریکا رایگەیاند، ئەمریکا بەردەوام دەبێت لە هەوڵەکانی لە بەرەنگاربوونەوەی تیرۆر بە هاوکاری لەگەڵ وڵاتانی ناوچەکە و ئەوان سەرنج دەخەنە سەر دۆزینەوەی ئەو چارەسەرانەی متمانە دروست دەکات و دەبیتە هۆی هاوبەشی نوێ.

ئەوەشی خستەڕوو، " ئێمە پشتگیری لە بەهێزکردنی هاوپەیمانی لەگەڵ ئەو وڵاتانە دەکەین کە رێز لە یاسا نێودەوڵەتییەکان دەگرن و ئەمەش بەو مانایە نییە کە پێویستە لەسەر هەموو پرسەکان رێکبکەوین، بەڵکو لەسەر بنەما سەرەکییەکان رێکبکەوین."

ئاماژەی بەوەشدا، "وڵاتەکەی بەردەوام دەبێت وەک هاوبەشێکی چالاک لە رۆژهەڵاتی ناوەڕاست و هەرگیز دوور ناکەوینەوە و بۆشایییەک لە ناوچەکەدا بەجێ ناهێڵین کە لەلایەن چین، رووسیا یاخود ئێران-ەوە پڕبکرێتەوە".

وتیشی، ئەوان شایەتحاڵی ئەو هەوڵانەن کە لەلایەن روسیا و چین و ئێرانەوە بۆ تێکدانی سەقامگیری لە جیهان و رۆژهەڵاتی ناوەڕاستدا دەدرێن.

باسی لەوەشکرد، "چین گوشارەکانی لە جیهاندا زیادکردووە، بەتایبەتی لە ناوچەی هیند-پاسیفیک، روسیا بەردەوامە لە شەڕێکی دڕندانە و ناڕەوا لە دژی ئۆکرانیای دراوسێی، لە هەمان کاتدا ئێران بەردەوامە لە چالاکییە ناسەقامگیرکەرەکانی لە رۆژهەڵاتی ناوەڕاست".

هاوکات شا عەبدوڵای دووەم، پاشای ئوردون ئەوەی خستەڕوو، تەنها رێگە بۆ پێشکەوتن کارکردنە لە چوارچێوەی هاوبەشی بەهێزدا و هیچ ئاسایش و سەقامگیری و خۆشگوزەرانییەک لە ناوچەکەدا نییە بەبێ چارەسەرێک کە گەرەنتی دامەزراندنی دەوڵەتی فەلەستین بکات.

لەلایەن خۆیەوە، عەبدولفەتاح سیسی سەرۆکی میسر رایگەیاند، پێویستە وڵاتانی کەنداوبەشداری بکەن لە دۆزینەوەی چارەسەر بۆ ئەو پرسە دڕکاویانەی کە رووبەڕووی ناوچەکە و جیهان دەبنەوە.

باسی لەوەشکردووە، بەهێزکردنی رۆڵی دەوڵەتی نەتەوەیی و پەرەپێدان بە تواناکانی و رەخساندنی کەشێکی ئازادی و بەهێزکردنی ژنان دەتوانێت ئاواتەکانی گەلەکانی وڵاتانی کەنداو بەدیبهێنێت.

ئاماژه‌ی به‌وه‌شدا، "هیچ جێگه‌یه‌ك بۆ چه‌مكی میلیشیا و به‌كرێگیراو و باندی چه‌ك له‌ ناوچه‌كه‌دا نییه‌ و دامەزراندنی دەوڵەتێکی فەلەستینی کە بە تەبایی لەگەڵ دەوڵەتی ئیسرائیل بژی، ئاسۆی ئاشتی و سەقامگیری لە ناوچەکەدا دەکاتەوە."

لایخۆشیەوە، حەمەد بن عیسا پادشای بەحرەین ئەوەی خستەڕوو، دەبێت هەوڵەکان بەردەوامبن بۆ بەرەنگاربوونەوەی تیرۆر و ئایدیۆلۆژیای کۆنەپەرست و رێکخراوە دەرەکییەکان.

وتیشتی، "پێویستە بگەینە چارەسەرێکی سیاسی بۆ قەیرانی یەمەن و پشتیوانی لە گەلی یەمەن بکرێت."

هاوکات، شێخ تەمیم بن حەمەد ئەمیری دەوڵەتی قەتەر لە وتارەکەیدا ئەوەی خستەروو، وڵاتەكەی لەگەڵ هاوبەشەكانی لە ناوچەكە و جیهان كاردەكات بۆ دەستەبەركردنی لێشاوی بەردەوامی وزە و بەدیهێنانی سەقامگیری لە ناوچەی كەنداو پێویستە بۆ سەقامگیری جیهان.

هەروەها، ئاگربەستی نێوان لایەنەکانی یەمەن و دەستپێشخەری شانشینی عەرەبستانی سعودی بە نرخ هەڵسەنگاند.

مستەفا کازمی سەرۆک وەزیرانی عێراق ئاشکرای کرد، رێبازی عێراق لەسەر بنەمای بەهێزکردنی دیالۆگ و شەراکەتە لەگەڵ وڵاتانی ناوچەکە کە لە بەرژەوەندی هەمووانە و کاردەکەن بۆ فراوانکردنی بازنەی وەبەرهێنان لە وزەی جێگرەوەدا.

هەروەها، مستەفا کازمی پێشنیاری دامەزراندنی بانکی ناوچەیی بۆ پەرەپێدانی هاوبەشی لە نێوان وڵاتانی ناوچەکەدا کرد.

هەر لە کۆبوونەوەی لوتکەی هاریکاری کەنداو شێخ میشال ئەلئەحمەد ئەلسەباح شازادەی جێنشینی کوێت ئاماژەی بەوەدا، "هیوادارین ئەم لوتکەیە ببێتە سەرەتای دەستپێکێکی نوێ بۆ چارەسەرکردنی کێشەکانی ناوچەکە و ئاڵنگاریەکان پێویستیان بە راوێژکاری و هەماهەنگی و هاوکاری و لێکتێگەیشتنی زیاتر لە هەموومان هەیە بۆ رووبەڕووبوونەوەیان."

ئەمە لەکاتێکدایە، ئەمڕۆ شەممە لە شاری جدەی سعودییە لوتکەی هاریکاری کەنداو بە ئامادەبوونی سەرکردەی وڵاتانی کەنداو وجۆبایدن سەرۆکی ئەمریکا و مستەفا کازمی سەرۆک وەزیرانی عێراق و شا عەبدوڵا پادشای ئوردون و عەبدولفەتاح سیسی سەرۆکی میسر بەڕێوەچوو.