PM:02:02:21/04/2022
4160 جار خوێندراوەتەوە
هاتوچۆی سلێمانی رایگەیاند، بەهۆی ئەنجامدانی پێشبڕکێ و مانۆڕی مەترسیدارەوە لەسەر شەقامی گشتی تاسلوجە و بێزارکردنی خەڵکی و دروستکردنی مەترسی هاتوچۆ دەستیان بەسەر ژمارەیەک ئۆتۆمبێلی سەرپێچیکاردا گرتووە و شۆفێرەکانیشیان رووبەڕووی یاسا دەکەنەوە.
بەڕێوەبەرایەتی گشتی هاتوچۆی پارێزگای سلێمانی رایگەیاند، درەنگانی شەوی رابردوو دوای ئاگادارکراونەتەوە لەبارەی بوونی چەند ئۆتومبێلێکی سەرپێچیکار کە لەسەر شەقامی تاسڵوجە پێشبڕکێیان کردووە، تیمەکانیان چوونەتە شوێنی رووداوەکە و پێنج لەو ئۆتۆمبێلانەیان دەستبەسەر کردووە.
ئاماژەی بەوەشکردووە ئۆتۆمبێلەکانیان ڕەوانەی گەراجی دەستبەسەرداگرتنی بەڕێوەبەرایەتی
هاتووچۆی پارێزگای سلێمانی کران و شۆفێرەکانیان رووبەڕووی یاسا دەکرێنەوە.
هاتووچۆ ئەوەشی خستووەتەڕوو، دیاردەی پیشبڕکێکردن سەرپێچییەکی هاتووچۆیە
و مەترسی کەوتنەوەی رووداوی قورس و مەرگرداری لێ دەکەوێتەوە، ئەوەش جگە لەوەی هاوڵاتییانی
بێزار و نیگەران کردووە، دەشڵێت، "بەهەموو شێوەیەک رووبەڕووی ئەو سەرپێچییە دەبنەوە
و شۆفێرانی سەرپێچیکار رووبەڕووی یاسا دەکرێنەوە."
