خەلکێ دهۆکێ ب بەیاننامەیان رازی نابیت!
PM:05:52:27/05/2023
11108 جار خوێندراوەتەوە
ئارام حسێن
+
-
د روژا پارێزگەهبوونا دهۆکێ دا ساخکرن ب بەیانامە
و کەرناڤالا ب تنێ بەس نینە کو خەلکێ دهۆکێ پێ بهێتە رازیکرن ژبەرکو رەوشا خەلکێ
دهۆکێ یا خرابە و روژ بۆ روژێ رێژا هەژاریێ و بێکاریێ بەرەڤ زێدەبونێ دچیت و خەلکێ
وێ ب پشگوهـ هاڤێتی ترین خەلک دهێنە دیتن.
تانوکە هێشتا ل گەلەک دەڤەرێن وێ پارێزگەهێ دەستپێکیترین
مافێن ژیانێ بۆنە هاتینە دابینکرن و خەلکێ وان ژ نەبوونا خزمەتگوزاریان دنالن.
دهۆک کو خودانا زۆرترین رێژا داهاتێ هەرێما
کوردستانێ و زۆرترین رێژا پەترۆلێ لێ یە تانوکە ژ هەژی هەبوونا بالەفرخانێ نا هێتە دیتن و پروژەیێ بالەفرخانێ
هێشتا ئەردە بتنێ ل دەمێ هەلبژارتنان بیرا بەرپرسان لێ دهێت و سوزێن بریسقەدار ددەن
و ژ قەستا.
ژ رویێ ساخلەمی ڤە تانوکە خەلکێ دهۆکێ د چنە
باژێرێن دی یان ژی ژ دەرڤەی وەلاتی بو وەرگرتنا چارەسەریێ هەرکو چ نەخوشخانەیێن
باش ل دهۆکێ نینن و چەندین سالن چەند ئاڤاهی ب هەیکەل ماینە و نەهاتینە تەمامکرن.
دوو خالێن سنوری یێن گرنگ ل دهۆکێ هەنە کو هەرێما
کوردستانێ و عیراقێ ب جیهانا ئابوری ڤە گرێددەت لێ ژبلی بەربرس و هندەک کەسێن نێزیکی
وان کەسێ دی مفای ژێ نابینیت و نەبوینە ئەگەرێ خوشگوزەرانیا خەلکێ وێ پارێزگەهێ.
ژ روویێ خواندنێ ڤە ل دهۆکێ ئاریشەیا ئاڤاهی و
کێمیا رێژەیا ماموستایان هەیە و تا نوکە ل گەلەک جهان قوتابخانە و باخچە نینن و ئەوجهێن
لێ هەین ژی دوو دەوامی و سێ دەوامی نە.
ژ روویێ ئازادیێ ڤە هێشتا خەلک دهێتە نانبرکرن
ل سەر گۆتنا راستیێ و دیارکرنا کێم و کاسی و گەندەلیێن دەسهەلاتدارا و هێشتا
روژنامەڤان و چالکڤان دهێنە دەستەسەرکرن و هەر کەسێ بانگەشەیێ ژی بو خونیشاندان و
خرڤەبوونان بکەت دهێتە گرتن و سەرەدەریا تیرورستا دگەل دهێتەکرن.
ئەڤە و ب دەهان کێم و کاسیێن دی کو دهۆک تێدا د
نالیت و کەسێن خو ب خودانێن دهۆکێ د زانن دهۆک پشت گوهـ هاڤێتیە و بۆ خەلکی دیار
بوویە ئێدی ئەڤە بکێر برێڤەبرنا ڤێ پارێزگەهێ ناهێن و فەشەل د هەمی سێکتەران دا ئینایە.
ئارام حسێن – سەرپەرشتێ نەوەی نوێ ل دهۆکێ
٢٧/٥/٢٠٢٣