گرانبوونا بەنزینێ چ کارەساتان بدیف خۆدا دئینیت؟
PM:10:17:03/11/2021
2860 جار خوێندراوەتەوە
میر نێروەی
+
-
هندەک ژ پێدڤیێن رۆژانەیێن ژیانێ روولەکێ بەرچاڤ
دبینن و د هەستیارن هەردەما ئەو توشی تێکچوونەکێ دبن، باندوریێ لسەر هەمی جڤاکی و
بازاری دروست دکەن، فەرە لسەر حکومەتێ ب هەر ئاوایەکێ بیت بۆ ولاتیان دابین بکەت ب
بهایەکێ گونجایی، هەردەما ڕەوشەک یان چارەسەریەکا گونجایی بۆ هەر ئاریشەکێ نەهاتە دیتن
پێدڤیە وەزیرێ وێ وەزارەتێ دەست ژکاری بکێشیت یان بهێتە لادان، ژبەرکو سەرۆک و وەزیر
و بەرپرس ئەگەر نەکارن ئاریشان چارەسەربکەن هەبوونا وان تشتەکێ بێ بهایە، ئێک ژ
وان پێدڤیان پەنزینە، گرانبوونا وێ بەردەوام مژارەکا گەرمە، ئەگەر تو پشتی سالەکا
دی ژی ڤی بابەتی بخۆینی هەر یا بەردەوامە، ژبەرکو چارەسەری ئاسانە لێ ب ئەنقەست
ناهێتە چارەسەرکرن.
دخوازم لڤێرە ئاماژێ ب وێیەکێ بکەم، ئەگەر بەنزین
و غاز بهێنەگرانکرن دێ چاوا رەوشا ئابووری و جڤاکی تێکچیت و زۆرترین مژار دێ توشی
هنگافتنێ بن.
ئەگەر بەنزین گران بوو دێ بهایێ ڤەگۆهاستنا ب
تەکسی و پاس و کوستەر و بارهەلگران ژی گران بیت واتە بزاڤا خەلکی ڤەگۆهاستنا کلوپەلان
دێ بزەحمەتر و گڕانتر بیت، دگەل گرانبوونا کریا ڤەگۆهاستنێ دێ بهایێ ئاهێن خوارنێ
گران بیت، دگەل گرانبوونا ئاهێن خوارنێ و غازێ دێ نان گران بیت، هەڤدەم دەما نان
گران بۆ برس دێ پەیدا بیت، ب هەبوونا برسا بەردەوام دزی و تاوان زێدە دبن، زێدەبوونا
دزی و تاوانان، ئەولەهیا باژێر و وەلاتی دێ تێکچیت و کۆنترولکرن دێ بزەحمەت بیت، دەما
ئەولەهی تێکچوو دەرفەتا تیرۆر و هەرتشتی دێ ب ئاسانتر بیت، دزانم نها تو دبێژی ئەڤە
هەمی بتنێ ژبەر نەبوونا بەنزینێ!؟، دبێژم ئەرێ، ژبەر بەنزینێ، ئەگەر ئەڤە بۆ تە یا
سەیر بیت، تەماشەی رەوشا نها بکە، سرا بەنزین و غازێ رۆژانە درێژە و ب بهایەکێ گڕان
دهێتەدان و هند جاران نینە و ئاهێن خوارنێ بئاوایەکێ بەرچاڤ گڕانبووینە هەروەسا نان گرانبوویە، نها پتریا خەلکی بڕسیە،
ئاستێ دزی و تاوانان ژی بلند بوویە، ئەگەر ئەڤ قەیرانێن دروستکری نەهێنە چارەسەرن
دێ خرابتر ژ یا سەری من گوتی روویدەت.
چارەسەریا قەیرانێن گرێدایی ب ژێدەرێن پەەترۆلێ بتنێ ب دانانا پارزینگەهەکێ یە، و ئەو پارزینگەهە دێ بازارێ پەترۆلێ زێدەتر بەرفرەهـ
کەت، ژبەر کو نها پەترۆلا رەش ب دەرڤە دهێتە فرۆتن، لێ دگەل دانانا پارزینگەهێ ل هەرێمێ
دێ پەترۆلا ڕەش هێتە بەرهەمئینان و نەفتا سپی و بەنزین و گازوایل و قێر... ژێ هێنە
جووداکرن و ب جودا جودا بازار پێ هێتەکرن، لێ پشتی لهەڤهاتنا ٥٠سالیا هەرێمێ دگەل تورکیا، هەرێم دەستڤالا و
دەینداربوویە، سالانە خۆ شیانێن پارڤەکرنا نەفتا سپی یا مالان ژی نەمایە، ئەو پشکێن
دی یێن دهێنە دەرئینان داهاتێ وان د وەزارەتا دارایی دا ناهێتە دیتن، لدیڤ هند زانیاریان
د نها دا دەستێ وەزارەتا سامانێن سروشتی ناگەهیتە هژمارەکا زۆرا بیرێن پەترۆلێ و
سامانێن سڕوشتی، زانیاریێن تەمام ژی لسەر نینن.
براستی ژی تشتەکێ نەبەرعەقلە، ئەڤ هەمی قەیرانێن
هەڕێما کوردستانێ دهێنە دیتن، هند جارا هند ئاستێ حکومەتێ لاواز دهێتە دیتن، کو هەست
ب هەبوونا حکومەتێ ناهێتەکرن، نەڕەوایە داهاتێ ولاتی لسەر پەترۆلێ بیت و رۆژانە قەیرانێن
نەفتا سپی و پەنزین و غازێ هەبیت، دەستهەلاتێ فشەل د هەمی سێکتەران دا ئینایە و د
فرۆتنا پەترۆلا هێشتا ل ژێر ئەردی ژی دا خوسارەتە.ئەڤجا سەرۆکاتیا حکومەتێ ژی ل
شوونا چارەسەریێ، خوزیا نەبوونا پەترۆلێ دکەت! ئەڤە دەلیلە لسەر قەیرانێن بەردەوام،
بتنێ خالەکا دی بۆ باشترکرنێ روولێ خۆ دبینیت ئەو ژی نەرازیبوونا خەلکی یە و دیارکرنا
هەلۆیستێن گشتی د جاددەیێ دا.