PM:05:32:08/12/2021
5436 جار خوێندراوەتەوە
+
-
وەزارەتا ناڤخۆیا لیتوانیا ڕاگەهاند، هەر کۆچبەرەکێ ب رازیبوونا خۆ بۆ وەلاتێ خۆ ڤەگەریت دێ کوژمێ هزار یۆرۆیا وەک دیاری پێدەن.
ئەڤرۆ چارشەمبی، ئاغنی بیلۆتیتۆ وەزیرێ ناڤخۆیێ لیتوانیا ڕاگەهاند، ڤەگەڕاندنا کۆچبەران بۆ وەلاتێن وان پرۆسەکا ئالوز و درێژە و پێتڤی ب دەمیە.
ئاماژە ب وێیەکێ کریە، سالانە حکومەتا لیتوانیا کوژمێ ١١ هزار یۆرۆیان دێ بۆ هەر کۆچبەرەکی مەزێخیت و ئەڤەژی دێ بارگرانیێ بۆ حکومەتێ دروستکەت.
دبێژیت ژی، ئەو دێ هەمی رێیا گرنەبەر ب ئارمانجا ڤەگەڕاندنا کۆچبەران ب رازیبوونا وان بۆ وەلاتێن وان.
ئاغنی بیلۆتیتۆ ئەشکەراکر، پشکەکا زێدە یا وی پارەی بۆ ڤەگەڕاندنا کۆچبەران تەرخانکری، ژ ئالیێ کۆمسیۆنا ئێکەتیا ئەوروپا هاتیە دابینکرن.
لدویف راپۆرتا وەزارەتا ناڤخۆیا لیتوانیا تەڤایا داخازیێن وان کۆچبەران هویربینی بۆ هاتیە کرن کو ل مەهێن هاڤینێ و ئەیلولێدا ل سنورێن بیلاروسیا ب نەیایاسیایی چووینە ناڤ وی وەلاتی.
دەربارەی مافێ پێدانا پەنابەریێ، حکومەتا لیتوانیا ڕاگەهاند، ژ کۆما سێ هزار و ٢٧٢ دا کو ب مەرەما پێدانا مافێ پەنابەریێ پشکێشی حکومەتا وی وەلاتی کریە، بتنێ ٥٤ داخازکری وەرگرتینە و مافێ پەنابەریێ پێداینە.
د هەبمەردا ٨٦ دۆسیێن گرتی و ٤٨ دۆسیێن ب هەلاویستی ماینە.
لدویف گوتنا وەزیرێ ناڤخۆیێ لیتوانیا، پتریا وان کۆچبەرێن کو گەهشتینە لیتوانیا کۆچبەرێن راستەقینە نینن و هێجەتێن پێتڤی نینن بۆ بدەستڤە ئینانا مافێ پەنابەریێ ل وی وەلاتی.
هەڤدەم د ڕاگەهاندنێ دا هاتیە، بڕیارا پشتەڤانیا دارایی بۆ ڤەگەڕاندنا کۆچبەران هەیا ٢٠ی ڤێ مەها کانونا دووێ یا سالا بهێت دێ یا بەردەوامبیت و بتنێ بۆ وان کۆچبەرانە یێن نها ل سنورێ لیتوانیا.
دبێژیت ژی، ٤٠٠ کۆچبەرێن نەیاسایی ل سنوری هاتینە دەرئێخستن کو ٣٤٥ ژ وانا ب خۆبەخشی چووینە دەرڤەی وەلاتی.
ئەڤە ددەمەکیدایە نێزیکی ٤٢٠٠ کۆچبەران ل سنورێ بیلاروسیا چووینە ناڤ ئاخا لیتوانیا د ئەڤسالەدا و حکومەتێن ئێکەتیا ئەوروپا مێنسک تۆهمەتبار دکەن ب بکارئینانا کۆچبەران وەک چەکەک دژی ئێکەتیا ئەوروپا.