PM:11:42:28/04/2025
208 جار خوێندراوەتەوە
+
-
رێنمایا ژمارە (٣ یا سالا ٢٠٢٥) یا تۆمارکرنا تەکسیێن نوی،
دکەڤیتە بیاڤێ جێبەجێکرنێ و وەزارەتا ناڤخۆ ژی دبێژیت، بتنێ ئەو ترۆمبێلێن سێ سالێن
مۆدێلێن دوماهیێ هاتینە پەسەندکرن دێ هێنە گوهۆرین بۆ تەکسی.
ئەڤرۆ دووشەمبی ٢٨ـێ نیسانا ٢٠٢٥، وەزارەتا ناڤخۆ یا هەرێمێ
راگەهاندنەک بەلاڤکر کو تێدا هاتیە، د پێنگاڤەکا نوی دا ب ئارمانجا نویکرنا تەکسیان
ل هەمی هەرێمێ و بلندکرنا ئاستێ پاراستنا ژینگەهێ و باشترکرنا خزمەتگوزاریێن سەرنشینان
و بجهئینانا ستانداردێن تەکنیكى یێن نوی، دەرگەهێ تۆمارکرنا تەکسیێن نوی، پشتی چەندین
سالان ژ راوەستانێ، ڤەدکەت و رێنمایا ژمارە (٣ یا سالا ٢٠٢٥) یا تۆمارکرنا تەکسیێن
نوی، دکەڤیتە د بیاڤێ جێبەجێکرنێ دا.
هاتیە زەلالکرن ژی، ل دویڤ رێنمایا نوی، ب تنێ ئەو ترۆمبێلێن
کو ستانداردێن تایبەت یێن ژینگەهى و تەکنیكى تێدا هەین و ب ئاوایەکێ یاسایی و فەرمی
هاتینە هاوردەکرن بۆ هەرێما کوردستانێ، مافێ تۆمارکرنێ وەکی تەکسی دێ هەبیت.
ئاماژە ب وێیەکێ ژیکریە، ئەو ترۆمبێلێن کێم مەزاخ و هەڤالێن
ژینگەهێ نە کو بتنێ ب بەنزینێ کار دکەن، یان ئەو ترۆمبێلێن ژ بنەرەت دا بتنێ ب
غازا شل (LPG) کار دکەن، هەروەسا
ترۆمبێلێن هایبرید و ترۆمبێلێن ب تمامی کارەبایی (EV)، وەک تەکسی بێ رسومات هاریکاریا تەمام بۆ تۆمارکرنا
وان هاتینە کرن.
ئەو یەکژی بەرچاڤکریە، لدیڤ وێ رێنمایێ چ ژمارەکا تەکسیێ
ل سەر ئاستێ کوردستانێ زێدە نابیت، بەلکو ئەو تەکسیێن هەین خودانێن وان دشێن مفای
ژ ژمارە (تابلۆیێن) خۆ وەرگرن بۆ تەکسیێن مۆدێل نوی (کو ژمارە دەمکی بن یان ترۆمبێلێن
سێ مۆدێلێن دوماهیێ یێن تۆمارکری بن) و تەکسیێن کەڤن ژی دێ بنە ترۆمبێلێن تایبەت و
ژمارا (تابلۆیا) تایبەت بێ مەزاختیێن دارایی دێ بۆ هێتە دان.
هەروەسا، لدیڤ رێنمایا نوی، رەنگێ تەکسییا نوی دێ هەمان
رەنگێ تەکسییا کوردستانێ بیت ب کۆدێ (4Q0) و خودانێ تەکسیێ
دشێت ل کوردستانێ ب ڤی کۆدی تەکسییەکێ بویەخ کەت یان ژ کۆمپانیێ ب ڤی رەنگی و کۆدی
یا بەردەست بیت بۆ کرینێ. تەکسیێن کەڤن ژی لدیڤ داخازیا خودانێ وێ دێ هێنە سبخکرن
ب هەر رەنگەکێ پەسەندکری ژ بلی رەنگێ تەکسیێ.
گۆت ژی، پێدڤیە ترۆمبێلێن نوی هاتبنە هاوردەکرن و پیڤەرێن
سلامەتی، تەکنیكى، و ژینگەهى تێدا هەبن ئەوێن د رێنمایا هاوردەکرنا ترۆمبێلان ژمارە
٧ یا سالا ٢٠٢١ یا سەرڕاستکری دا هاتینە دیارکرن، بتنێ ترۆمبێلێن سێ سالێن مۆدێلێن
دوماهیێ هاتینە پەسەندکرن بۆ گوهۆرین بۆ تەکسی، بۆ ترۆمبێلێن هایبرید و ب تمامی
کارەبایی (٧٤) جۆر و بۆ ترۆمبێلێن بەنزین (٨٩) جۆر وەک پاشکۆ هاتینە دیارکرن کو رێک
پێ ھاتیە دان بهێنە گوهۆرین بۆ تەکسی.