PM:09:06:14/10/2021
916 جار خوێندراوەتەوە
+
-
رێڤەبەریا گشتیا هاتن و چوونا عێراقێ
ڕاگەهاند، دگەل کۆمپانیەکا بیانی دبزاڤێ دانە بۆ ئیمزاکرنا گرێبەستەکێ ب مەرەما
جێبەجێکرنا پرۆژێ یەکخستنا تابلۆیێن ترۆمبێلان ب زمانێ ئینگلیزی و ئەڤە ژی دێ
بهەماهەنگیا دگەل هەرێما کوردستانێ بیت.
ئەڤرۆ پێنجشەمبێ، تارق ئیسماعیل، رێڤەبەرێ
گشتیێ هاتن و چوونا سەر ب وەزارەتا ناڤخۆیا عێراقێ ڤە بۆ رۆژنامەیا فەرمی یا سەباح ڕاگەهاند، پشت ب بەرنامەیا کاری ب
هەماهەنگیا دگەل هەرێما کوردستانێ دهێتەگرێدان کو پێکدهێت ژ ئێکخستنا تابلۆیێن
ترۆمبێلان و نڤیسینا ب ئینگلیزی وەکی وێیا کو د پتریا وەلاتی دا هەیە.
بەحسا وێیەکێ ژی کر، تابلۆ دێ ب هەمان قەبارێ
تابلۆیێن بەرێ ب ڕەنگێ سپی بیت، سپی بۆ تایبەت، سور بۆ کرێ، شین بۆ حکومی و کەسک
بۆ سوپای، زێدباری وێیەکێ دێ کودەکێ دیارکری هەبیت بۆ هەر پارێزگەهەکێ ل شوینا
ناڤێ وێ.
تارق ئیسماعیل ئاماژە ب وێیەکێ ژی کر، وەزارەتا
ناڤخۆ د ئامادەکاریێ دایە بۆ گرێبەستکرنێ دگەل کۆمپانیەکا تایبەت ب تابلۆیان بۆ
ڤەکرنا لقەکا خۆ ل بەغدا، ب مەرەما زانکرنا بلەز برێڤەچوونا کارێن وان و پێدانا
دەمەکێ دیارکری ب خودانێ ترۆمبێلان.
ژ ئالیێ خۆڤەژی، فازل حاجی، پەیڤدارێ هاتن و
چوونا هەرێمێ بەریا نها ڕاگەهاندبوو، بەریا نها چەندین جاران لەهەڤهاتن دناڤبەرا
هەردوو وەزارەتێن ناڤخۆ یێن هەرێمێ و فیدڕالدا بۆ ئێکگرتنا تابلۆیێن ترۆمبێلان
هاتیەکرن، لێ هێشتا نەچووینە دبیاڤێ جێبەجێکرنێ دا و نها بڕیارە جارەکا دی دەست ب
جێبەجێکرنا پلانێ بهێتەکرن، کو پێکدهێت ژ گرتنا بەرا رێکارێن ئێک شێوازێ تابلۆیێ
ترۆمبێلان ل هەمی عێراقێ.
ئەڤە د دەمەکێ دایە، هەر ئەڤرۆ، رێڤەبەریا
گشتی یا هاتن و چوونا عێراقێ ڕاگەهاندنەک بەلاڤکریە و تێدا هاتیە، لێکتێگەهشتن
دناڤبەرا هەرێما کوردستان و حکومەتا عێراقێ دا هاتیەکرن ل پێناڤ ئێکخستنا تابلۆیێن
ترۆمبێلان و ئاسانکاریکرنا رێکارێن مامەلەکرنا تایبەت ب وێ پرۆسەیێ ڤە هاتیە
هەبوونێ.