AM:09:47:25/03/2024
812 جار خوێندراوەتەوە
+
-
وەزارەتا پەترۆلا عێراقێ ڕاگەهاند، کۆمپانیێن پەترۆلا هەرێمێ ب
ئاوایەکێ فەرمی گرێبەست و داتایێن بەرهەمئینانا زەڤیێن پەترۆلێ رادەستی حکومەتا
عێراقێ نەکرینە و ئەڤە ژی سەدەمێ سەرەکیێ دەستپێکرنا هناردەیا پەترۆلا هەرێمێ یە ب
رێکا بەندەرێ جەیهانێ تورکیا.
ئەڤرۆ دووشەمبی، وەزارەتا پەترۆلا عێراقێ
ڕاگەهاندنەک بەلاڤکر و تێدا هاتیە، دەستپێکرنا هناردەیا پەترۆلا هەرێمێ ل تورکیا بۆ
وێیەکێ ڤەدگەریت کو تا نها ب ئاوایەکێ فەرمی گرێبەست و داتایێن بەرهەمێن پەترۆلیێن
زەڤیێن هەرێمێ نە گەهشتینە دەستێ وان.
ئاماژە ب وێیەکێ ژیکر، هەر دەمێ کۆمپانیێن پەترۆلیێن هەرێمێ بەرهەمێن
زەڤیێن پەترۆلێ ب فەرمی لدیف یاسایێ رادەست بکەن د هەیامەکا زۆر نێزیک دا لدیف
دەستوور و یاسایێ هناردەکرنا پەترۆلا هەرێمێ دێ دەستپێکەت.
بەحسا وێیەکێ ژیکر، حکومەتا هەرێمێ ب ملیاران دۆلاران قەردارا
کۆمپانیێن پەترۆلی یە کو زێدەگاڤی تێدا کریە و حکومەتا فیدرالی زانیاری دەربارێ
وان قەران نینە.
دوهی ئێکشەمبی، کومەلەیا پیشەسازیا پەترۆلا
کوردستانێ ناسیار ب "ئەپیکۆر" ڕاگەهاند، هەیاما سالەکێ یە هناردەیا
پەترۆلا هەرێما کوردستانێ ب رێکا بەندەرێ جەیهانیێ تورکیا هاتیە ڕاگرتن و د وی
دەمی ژی دا زیانا ١١ ملیار دۆلاران هەبوویە.
ئاماژە ب وێیەکێ
ژیکر، گووتۆبێژ دگەل حکومەتا عێراقێ هەبووینە و گووتۆبێژان بەرەڤ پێشچوونەکا باش ب
خوڤە دیتیە و دوهی جۆ بایدن سەرۆکێ ئەمریکا ل واشنتۆن لسەر هناردەکرنا پەترۆلا هەرێمێ
گووتۆبێژ دگەل شاندێ عێراقێ کریە.
رۆژا ٢٥ـی ئادارا
٢٠٢٣ ب بڕیارا دادگەها ناڤدەولەتیا پاریس، هناردەیا پەترۆلا هەرێمێ کو رۆژانە ٤٥٠
هزار بەرمیل بوون هاتە راگرتن، مەها ئەیلولا ٢٠٢٣ـێ تورکیا راگەهاند، بەرهەڤن بۆ دەست
پێکرنا پەترۆلا هەرێمێ، لێ تا نها ب سەدەما داخازکرنا پارەیەکێ زۆر هناردەیا پەترۆلێ
دەست پێنەکریە.
راگرتنا هناردەیا پەترۆلا هەرێمێ د دەمەکێدایە، پارتی و یەکێتی ب رێکا
تانکەران بەردەوام بووینە ژ فرۆتنا پەترۆلێ ب قاچاخ و رۆژانە نێزیکی ٢٩٠ هزار
بەرمیلێن پەترۆلێ ب قاچاخ دبەنە دەرڤەی سنورێ هەرێمێ.