سەرنووچە:

عێراقێ ڕێژەیا وەرگرتنا گەنمێ جوتیاران زێدەکر

PM:03:40:31/05/2023

1720 جار خوێندراوەتەوە

+ -

رێڤەبەرێ گشتی یێ نوینەراتیا حکومەتا هەرێمێ ل بەغدا بۆ دیجیتال میدیایا ئێن ئاڕ تی ڕاگەهاند، حکومەتا عێراقێ رێژەیا وەرگرتنا گەنمێ جوتیاران زێدەکر.

ئەڤرۆ چارشەمبیێ، بەختیار حاجی رێڤەبەرێ گشتی یێ نوینەراتیا حکومەتا هەرێمێ ل بەغدا د داخۆیانیەکێ دا بۆ ئێن ئاڕ تی بەحسا وێیەکێ کر، حکومەتا عێراقێ بڕیاردایە رێژەیا وی گەنمێ ژ جوتیاران وەردگریت بۆ ٥٠٠ هزار تەنان زێدە بکەت.

ئاماژە ب وێیەکێ ژی کر، وەزارەتا چاندنێ بڕیارا رێک پێدانێ بۆ هاتنا وی بەرو بومی چاندنێ دا کو ل هەرێمێ دهێنە بەغدا، ژبەرکو پێشتر ل زالگەهان ب هێجەتێن جودا رێک نەددا بەروبومێ هەرێمێ بەرەف دەڤەرێن خار و ناڤەراست یێن عێراقێ بهێتە هاوردەکرن.

ئەڤە د دەمەکی دایە پێشتر وەزارەتا بازرگانیا حکومەتا دەم بسەرڤەچوویا هەرێمێ راگەهاند، سایلۆیێن هەرێمێ بسەر جوتیارێن هەرێما کوردستانێ دهێنە ڤەکرن بۆ پڕۆسەیا وەرگرتنا گەنمی.

هەروەسا، ڕێڤەبەریا گشتیا بازرگانیا هەرێمێ رێنمایی و چەوانیا تایبەت ب وەرگرتنا گەنمێ ئەڤسالە داڕشتینە.

پڕۆسەیا وەرگرتنا گەنمێ جوتیارێن هەرێمێ ب ڤی ئاوایی دبیت:

لهەمبەر هەر تەنەکا گەنمی کۆژمێ ٨٥٠ هزار دیناران ب جوتیاران دهێتە دان، پشتی وەرگرتنا نموونە و پشکنینێ، گەنم ژ جوتیاران دهێتە وەرگرتن.

بۆ ئەڤسالە ل سنوورێ هەمی پارێزگەهێن هەرێمێ ٣٧٥ هزار تەنێن گەنمی ژ جوتیارێن هەرێمێ دهێنە وەرگرتن.

کۆژمێ چل ملیار دیناران ژ لایێ حکومەتا عێراقێ ئێخستینە سەر هژمارا بەنکی یا وەزارەتا بازرگانیا هەرێمێ و پشتی چەند رۆژان ژ پڕۆسەیا وەرگرتنا گەنمی چەکێ بەنکێ ب جوتیاران دهێتە دان و د دەمەکێ کێمدا ژ بەنکان پارەیێ گەنمی ب کاش وەردگرن.

ل سالێن بۆری ب سەدەمێ هەبوونا ئاریشە و ناکۆکیان دناڤبەرا حکومەتا بەغدا و حکومەتا هەرێمێ دا پڕۆسەیا پارەیێ گەنمێ جوتیاران پاشکەفت و دڤی دەمیدا ب ئاوایێ چەند وەشانەکان حکومەتا عێراقێ پارەیێ گەنمێ جوتیاران رەوانە کرن.


گەلەری