AM:10:41:05/05/2023
1208 جار خوێندراوەتەوە
+
-
سپێدەهیا ئەڤرۆ ل دەمژمێر ٩ دەرگەهێ بنگەهێ دەنگدانێ ل
کونسولخانا تورکیا ل هەولێرێ ب روویێ دەنگدەرێن تورکیا هاتە ڤەکرن و پرۆسەیا
دەنگدانێ بۆ هەلبژارتنا سەرۆککۆمارەکێ نووی و ٦٠٠ ئەندام پەرلەمانێن وی وەلاتی
دەستپێکر، بڕیارە ئەو پرۆسە ل هەرێمێ و عێراقێ بۆ دەمێ سێ رۆژان بەردەوام بیت.
پرۆسەیا هەلبژارتنا سەرۆک و پەرلەمانێ تورکیا ل هەرێمێ و
عێراقێ بۆ دەمێ سێ رۆژان بەردەوام دبیت کو ئەڤرۆ ٥ێ ٥ێ ٢٠٢٣ێ دەست پێکر و هەیا ٧ێ
٥ێ ٢٠٢٣ێ بەردەوام دبیت.
ل تەماما عێراقێ پێنج هزار و ٧٤١ دەنگدەرێن تورکیا مافێ
دەنگدانێ هەیە و ل وێ هژمارێ ژی سێ هزار و ٨٣٤ دەنگدەرێن تورکیا ل هەرێما
کوردستانێ نە.
ل عێراقێ و هەرێمێ ل هەر ئێک ژ پارێزگەهێن بەسرە و بەغدا
و هەولێر پرۆسەیا دەنگدانێ بۆ هەلبژارتنا سەرۆککۆمارەکێ نووی و ئەندامێن پەرلەمانێ
تورکیا بڕێڤەدچیت. سێ سندوقێن دەنگدانێ ل هەولێرێ هەنە و بەغدا و بەسرە ژی هەر ئێک
و سندوقەک بۆ پرۆسەیا دەنگدانێ هەیە.
بڕیارە ل ١٤ێ ٥ێ ٢٠٢٣ێ هەلبژارتنا سەرۆکاتیا تورکیا
بڕێڤەبچیت و هەر ئێک ژ رەجەب تەیب ئەردۆغان سەرۆکێ نهایێ تورکیا و سەرۆکێ ئاک پارتی
و کەمال کلیچدار ئۆغلۆ سەرۆکێ جەهەپە دوو کاندیدێن هەڤرکێ ئێکن.
د ڤێ هەلبژارتنێ دا سێ ملیۆن و ٤٠٠ هزار دەنگدەران ل
دەرڤەی تورکیا مافێ دەنگدانێ هەیە و پێنج ملیۆن و ٢٠٠ هزار دەنگدەرێن دی ژی ئێکەم
جارە دەنگی ددەن. بۆ ڤێ هەلبژارتنێ پێنج هەڤپەیمانی هاتینە پێکئینان و هەر پارتەک
ژی بشێت گڕێکا ٧٪ێ دەربازکەت دێ شێت بچیتە پەرلەمانی.
ئەڤە د دەمەکی دایە، دەمێ چەند رۆژانە دەنگدانێ بۆ هەلبژارتنا
سەرۆکاتیا کۆمارێ تورکیا ل چەند وەلاتێن جیهانێ دەستپێکریە و هەیا نها ژی زێدەتری
٨٠٠ هزار کەسان دەنگ دایە.