ئۆپۆزسیۆن ل سەر دووڕیانا گوهۆڕینا حوکمڕانیێ یان مانا ڤێ دەسهەڵاتێ

496 جار خوێندراوەتەوە

پشتی سالا ٢٠٠٥ێ، پارتی و یەکێتی رێککەفتنا دوولایەنی هەبوویە و پێکڤە زۆرینە بوون، هەمی بڕیارەک ل دەف وان هەردوو حزبان بوو کو بێگومان د ڤێ رێککەفتنێ دا یەکێتی زیانەکا مەزن بەرکەفت و پارتی ئەو رەوشا نوکە دروستکر و خۆ ژی تێدا بوو ب حزبا ژمارە ئێک ل هەرێما کوردستانێ، ئەگەر یەکێتی ل شوینا هەڤپەیمانیێ دگەل پارتی، دگەل هێزێن دی دا هەڤپەیمانی دروست کربا، کارەساتا مەلەفا پەترۆلێ و دەست بسەرداگرتن و ب بارمتەگرتنا مووچێ فەرمانبەران روینەدا، هەلبژارتن و کۆمسیۆنا کۆنترۆلکری یا پارتی بوونا وێ نە دبوو، ١١ کورسیێن کێمینەیان بۆ پارتی ئێکلایی نەدبوون، سولفەیا هەڤژینیێ و سولفەیا خانووبەرێ دێزە بەدەرخۆنە نە دکرن، کارەبا گران نەکر و ب ڤی ئاوایێ نوکە کەرتێ ساخلەمیێ تەسلیمی کۆمپانیایان نەدهاتە کرن (کو پارتی مفا وەرگرێ سەرەکیێ وان گوهۆڕینان بوویە).

نوکە و پشتی ٢١ سالان، پارتی و یەکێتی وەک ژمارە پێکڤە ٦٢ کورسی هەنە و دشێن هەمی بڕیارەکێ پێکڤە بدەن، لێ ئەڤجارە چیرۆک جودایە، رەوشەک دروستبوویە کو پارتی و یەکێتی نەشێن وەک بەری نوکە پێکڤە حکومەتێ پێکبینن و ئەڤە سالەک پترە حکومەت پێک نەهاتیە.

د نوکە دا کەس نزانیت کی حکومەتێ دروست دکەت و چ کەس ب تنێ نەشێت حکومەتێ پێکبینیت! لێ تو ئەڤان بەڕێزان بەری چ تشت رویدا بیت، دبێژن ئەز ئۆپۆزسیۆنم و ئەز ئۆپۆزسیۆنم! باشە ئۆپۆزسیۆن بە، لێ ئۆپۆزسیۆنا کێی؟! کی دبێژیت تو حکومەتێ پێکنائینی؟ وەک ئەوا ل بەغدا هەمی هێز و لایەنێن سەرەکی نەشیاین حکومەتێ پێکبینن، کەسەک ئینا کرە سەرۆکێ حکومەتێ کو ب تنێ سێ کورسی هەبوون.

د ڤێ دەمێ هەستیار و گرنگ داینە پێدڤی یە ئۆپۆزسیۆن رۆڵێ خۆ یێ دیرۆکی ببینیت و ئازایانە بڕیارێ بدەت، ئەگەر نە ئەگەر ئەو رێکبکەڤن د ناڤبەرا خۆدا و ئۆپۆزسیۆن بێژیت رێککەفتن و هەڤپەیمانی حەرامە بۆ مە و ب تنێ بۆ پارتی و یەکێتی هاتیە کرن و ئەو ب تنێ تەماشەڤان بن، پا بوچی ئەڤ حزبە پشکداریێ د هەلبژارتنان دا دکەن و سۆزان ب خەلکی ددەن و خەونێن ڕەنگاوڕەنگ نیشا دەنگدەران ددەن؟!

ئێ باشە! ئەگەر دگەل یەکێتیێ دا رێکنەکەڤن، وەرن پێکڤە هەڤپەیمانیەکێ دروست بکەن کو من بەری نوکە داخوازا هندێ ژی کربوو و من گۆت بلا ببنە هەڤپەیمانیەک دگەل نەوەی نوێ و یەکێتی و ئەم هەمی پێکڤە دبینە زۆرینە، من گۆت ژی کو پۆستێن خۆ ژی دێ ب هەوە دەم! ب مەرجەکێ وەرنە پێش و ل دویرڤە تەماشەڤان نەبن و بلا ئەم هەمی ڤێ هاڤسەنگیێ بزڤرینین بۆ رێکا حوکمڕانیێ و سەرۆک وەزیرانەکێ ل دەرڤەی پارتی هەلبژێرین و حکومەتەکا جودا و خزمەتگوزار دروست بکەین کو خزمەتا هاولاتیان بکەت. بەلێ مخابن نەهاتن و هێجەتێن وان ئەوە کو ئەو ئۆپۆزسیۆنن «لێ ئاساییە د پەرلەمانی دا دگەل وان بن، د لیژنەیان دا دگەل وان بن، د کۆڕ و کۆمبوونان دا دگەل وان روینەخوار، ل بەغدا ژی دگەل وان بن»، ب هەرحال ئەڤ هێجەتە نە بۆ نوکە و نە بۆ دیرۆکێ ژی ناچن، ئەڤ هەلویستە د دیرۆکێ دا دهێتە نڤیسین کو ئەڤ بەڕێزە نەهاتنە پێش بۆ دروستکرنا ڤێ گوهۆڕینا دیرۆکی و گوهۆڕینا رێکا حوکمڕانیێ، ئەو دەڤ هێجەت هەر چ بن، هەمی ئەو هێجەتە دێ کەڤنە بەر نەفرەتا نەڤیێن مە یێن پاشەرۆژێ.

د ڤی رەوشێ دا کو هەمی مللەت چاڤەڕێی گوهۆڕینێ یە و پشکداریا هەلبژارتنێ کریە و دەنگ دایە، دڤێت تو بارێ خوارێ حوکمڕانیێ بۆ راست بکەی، کو ناکەی، هێجەتان دئینی، چیرۆک و حیکایەتان دخوینی کو ناچتە د گۆهێ فەرمانبەرێ بێ مووچە و کاسبکارێ بێ پارە و گەنجێ بێ کار و دانەمەزراندی دا، دەمێ هەلبژارتنێ تە سۆز ژی دابیتێ کو هەر دەلیڤەیەک بهێتە پێش تو دێ ڤێ حوکمڕانیێ گوهۆڕی! لێ نەخێر و تە نەکر! چونکی ب ساناهیترین کار ئەوە ل دویرڤە تەماشەڤان بی و بێژی من حەقێ سیاسەتێ نینە و ب تنێ ل فەیسبووکێ هەوار بکەی، هەوارا فەیسبووکی دێ بیتە دوماهیک بڕیار کو چ بۆ تە نەهاتە کرن، هەمی ئارمانجا تە ئەوە بهێی ببیە نووچەگەهانەکێ سیاسی و ل فەیسبووکێ خۆ بێژی کارەب گران بوو، پەترۆ وەسا لێ هات، فلان بار هاتە دزین، مووچە نەهات. هەلبەت ب زەلالی دبێژم کو ئێن ئاڕ تی گەلەک باشترە ژ وان حزبان ڤێ چەندێ دکەت.

مە بەری نوکە ب خونیشاندان، ب تەنکەرێن ئاڤێ، ب بەلاڤکرنا پەترۆلێ و بەنزینێ و چێکرنا تونێل و پر و رێک، ب شەڕێ د ناڤ پەرلەمانی دا، ب سکالا ل دادگەها فیدرالیا عیراقێ، ب پەیوەندیێن مە ل بەغدا رەوشا کوردستانێ مە گوهۆڕی و ئەو یاسایا هەلبژارتنێ مە گوهۆڕی. نوکە برادەرێن یەکێتی هاتینە دبێژن بلا پێکڤە بالانسا هێزێ و حوکمڕانیێ راست بکەینەڤە و وان داخازیان ل پەرلەمانی پێکڤە بچەسپینین، بێژم وەڵا مە نەڤێت و هەر ل فەیسبووکێ هەوار دکەم؟ ئاخەر کەسەکی پیچەک ئاقل هەبیت تشتێ وەسا دێ بێژیت؟