PM:02:57:31/08/2025
628 جار خوێندراوەتەوە
+
-
31ـی ئاب، رۆژا ئینانا بەعس و داگیرکرنا
پەرلەمانێ کوردستانێ، 28 سالان بەریا نها شەڕێ خویناوی یێ یەکێتی و پارتی چوو قۆناغەکا
نوی و ب ئارتێشا داگیر کەر شەڕێ هەڤدوو کرن و باجا وێ ژی ب تنێ خەلکێ فەقیر و هەژار
دا و ب دەهان هزار پێشمەرگە تێدا شەهیدبوون. نها ژی پشتی وان هەمی سالان ئەو حزب بەردەوامن
ژ گەندەلی و زۆرداری و سەرانە و باج وەرگرتن و روتکرنا خەلکی.
31ـی ئابێ خەلەکا بەری دوماهیکێ یا بوویەرێن
شەڕێ ناڤخۆ یێ دناڤبەرا یەکێتی و پارتی دا، کو دوو سال و چار مەهان پێشتر دەستپێکربوو،
پارتی و یەکێتی ب هزاران گەنجێن کورد دانە کوشتن و کرنە سوتەمەنیێ شەڕێ بەرژەوەندیێن
خۆ.
ئایارا 1994ـێ شەڕێ یەکێتی و پارتی ل قەلادزێ دەستپێکر،
پشترا ژی گەشە کر و دەڤەرێن دیێن هەرێمێ ڤەگرت. مەها ئابا 1996ـێ شەڕ گەهشتە هەولێرێ.
یەکێتی ل زۆربەیا دەڤەران پارتی دەرخست و هەولێر ژی هاتە گرتن.
ل 22ـێ ئابا هەمان سال مەسعود بارزانی ب نامەیەکێ
ب رێکا هەوالگریا عێراقێ ڤە داخازا هاریکاریێ ژ سەدام حسێن کر و وی ژی قەبیل کر.
بەرێ سپێدەهیا 31ـی ئابا 1996ـێ هێزەکا زۆرا
فرقەیێن ئێک و پێنجا زێرەڤانێن کۆماری ب چاڤ ساخیا پارتی ل چەند رەخان ڤە هێرش کرە
سەر هەولێرێ و پشتی چەند دەمژمێران کۆنترۆل کر و یەکێتی ڤەکشیا سلێمانیێ و دەوروبەرێ
وێ.
بوویەرێن 31ـی ئابێ، نەخشەیێ سەربازی و ئیداری
ل هەرێما کوردستانێ گۆڕی و پارتی پشتی ئەنفال و کیمیاباران و رەڤا بکۆم و سەرهلدانێ
جارەکا دی دەستێ بەعس و دەبابەیێن وان ئینانە باژێرێ هەولێرێ.
ئەڤە ژی ب خیانەتا پارتی ل هەمبەر خەلکێ
کوردستانێ هاتە نیاسین کو دگەل یەکێتی ژ پێخەمەت بەرژەوەندیێن پۆست و پارەی هەمی
تشتەکی دکەن، هەتا بەرهەڤن ژی دەستێ خۆ بێخنە ناڤ دەستێ بهێزترین نەحەز و دوژمنێ خەلکی.
31ـێ ئابێ هەرێم دابەشکر بۆ دوو ئیدارەیان
دناڤبەرا پارتی و یەکێتی دا، هەر ئەڤە ژی بوویە خەلەکەکا دیا شکەستنا حکومرانیا 33
سالێن دەربازبوویێن وان دوو حزبان، ئەو شکەستن ب ئاوایەکی یە پارتی هێشتا ژی شانازیێ
دکەت ب ئینانا دەبابەیێن بەعس بۆ سەر هەولێرێ و ئاڤاهیێ پەرلەمانی، لێ پشتی سێ دەهان
نەشیایە ب کێمی ڤە ئاڤا ڤەخارنێ بۆ وەلاتیێن هەولێرێ دابین بکەت.