PM:07:37:08/04/2024
2092 جار خوێندراوەتەوە
نوسینگەی سەرۆک وەزیرانی عێراق رایگەیاند، لە کۆبوونەوەی سەرۆک وەزیرانی عێراق و سەرۆکی کۆمسیۆنی باڵای سەربەخۆی هەڵبژاردنەکانی عێراق، جەخت کرایەوە لەسەر چارەسەر کردنی کێشەکانی بەردەم کۆمسیۆن و ئەنجامدانی هەڵبژاردنی پەرلەمانی کوردستان بەشێوەیەکی دادپەروەرانە.
ئەمڕۆ دووشەممە، محەمەد شیاع سودانی سەرۆک وەزیرانی عێراق لەگەڵ سەرۆکی کۆمسیۆنی باڵای سەربەخۆی هەڵبژاردنەکانی عێراق کۆبووەوە و لە کۆبوونەوەکەدا پێداچوونەوە بە هەوڵ و رێکارەکانی کۆمسیۆن کرا سەبارەت بە هەڵبژاردنی پەرلەمانی لە هەرێمی کوردستان.
هەروەها لە کۆبوونەوەکەدا ئاماژە بەوە کرا،
پێویستە سەرجەم کێشەکانی بەردەم کۆمسیۆن چارەسەر بکرێن و هەڵبژاردنێکی ئازاد و
دادپەروەرانە بۆ بەدیهێنانی خواستی گەلی کورد ئەنجام بدرێت.
ئەمەش لەدوای ئەوە دێت ئەمڕۆ، کۆمسیۆنی باڵای
سەربەخۆی هەڵبژاردنەکانی عێراق تیروپشکی بۆ ژمارەی کاندید و لیستەکان ئەنجامدا و
رایگەیاند، هەموو توانایەکیان دەخەنە گەڕ بۆ سەرخستنی هەڵبژاردنەکانی هەرێم.
