بەڕێوەبەری کەشناسی سلێمانی بە دیجیتاڵ میدیایی ئێن ئاڕ تی راگەیاند، ئەو شەپۆلی بارانبارینەی ئەمشەو دەستی پێکردووە بەردەوام دەبێت و سبەینێش کەش ناجێگیر دەبێت و بارانبارینی ناو بە ناو بەردەوام دەبێت. وتەبێژی وەزارەتی گواستنەوە و گەیاندنیش دەڵێت، "رۆژانی جەژنیش باران دەبارێت".
ئەمڕۆ یەکشەممە ئاسۆ کەمال بەڕێوەبەری کەشناسی سلێمانی لە لێدوانێکدا بۆ دیجیتاڵ میدیایی ئێن ئاڕ تی باسی لەوە کرد، سبەی دووشەممە کەشوهەوا ناجێگیر دەبێت و پلەکانی گەرما نزم دەبنەوە و خێرایی با ناجێگیر دەبێت.
ئەوەشی خستە روو، ناجێگیربوونی کەشوهەوا تەواوی ئەم هەفتەیە دەگرێتەوە و لە
رۆژی سێشەممە کەشوهەوا کەمێک جێگیر دەبێت و دواتریش دووبارە باران بارین
دەستپێدەکاتەوە.
هاوکات، دیلان رەشاد وتەبێژی وەزارەتی گواستنەوە و گەیاندن بە ئێن ئاڕ تی
راگەیاند، رۆژانی جەژنی رەمەزان باران بارین بەردەوام دەبێت و کەشوهەوا لە هەموو
هەرێم ناسەقامگیر دەبێت.
باسی لەوەش کرد، ئەو شەپۆلە باران بارینەی لە رۆژانی جەژندا روو لە هەرێم
دەکات ناوەناو دەبێت و بەهێز نییە. دەشڵێت، "هاوڵاتیان دەتوانن بچنە گەشت و
سەیران".
ئەوەشی خستە روو، پلەکانی گەرما لە جەژندا چەند پلەیەکی کەم دادەبەزن و
کاریگەری زۆریان نابێت.