دەستەی گشتی گومرگی عێراق رایگەیاند، بە هەماهەنگی لەگەڵ رێکخراوی نەتەوەیەکگرتووەکان بۆ وەبەرهێنان و گەشەپێدان ٩٠٪ـی کارەکانی بە ئەلیکترۆنی کردنی دەروازە سنورییەکان تەواوکراون. دەشڵێت، "لەگەڵ تەواوبوونی پرۆژەکەدا سیستمێکی خۆکاری دەروازە سنورییەکان بەڕێوەدەبات".
ئەمڕۆ هەینی، فیراس عوبەیدی بەڕێوەبەری پرۆژەی مۆدێرنسازی و خۆکاری دەروازە سنورییەکان لە دەستەی گشتی گومرگی عێراق بە ئاژانسی هەواڵی عێراقی راگەیاند، بەمەبەستی کۆنترۆڵکردن و بەرەوپێشچوونی مامەڵەداراییەکان و دەروازە سنورییەکانی عێراق لەگەڵ رێکخراوی نەتەوەیەکگرتووەکان گرێبەستێک واژۆکراوە.
ئاماژەی بەوەش کرد، گریبەستەکە لەلایەن
وەزارەتی داراییەوە ئەنجام دراوە و بە گوێرەی گرێبەستەکەش رێکخراوی نەتەوەیەکگرتووەکان
بۆ وەبەرهێنان و گەشەپێدانی دەروازە سنورییەکان، هەماهەنگ دەبێت لە بە ئۆتۆماتیکیردن
و مۆدێرنسازی دەروازە سنورییەکانی عێراق.
باسی لەوەش کرد، لە ئێستادا ٩٠٪ پرۆژەکە
کۆتایی هاتووە و لە دوای تەواوبوونی قۆناغی یەکەم دەستدەکرێت بە بەئەلیکترۆنیکردنی
سیستمی دارایی سەرجەم دەروازە سنورییەکانی عێراق و بە تەواوی لە ژێریەک سیستمی ئەلیکترۆنی
و ئۆتۆماتیکیدا کاردەکەن. وتیشی، " ئەم هەنگاوە رێگە لە بەهەدەردانی داهاتی دەروازە
سنورییەکان دەگرێت و پرۆژەکەش بە تەواوی لە ماوەی حەوت ساڵدا جیبەجێدەکرێت".
ئەوەش لە کاتێکدایە، لەیەکەم هەنگاودا
بۆ بە ئەلیکترۆنیکردنی دەروازە سنورییەکان وەزارەتی دارایی عێراق بانکی رافیدەینی
راسپاردووە بۆ ئەنجامدانی مامەڵەکان و لەیەکەم قۆناغیشدا دوو دەروازەی سنووری بە ئەلیکترۆنی
کراون، هاوکات پێشتریش وەزارەتی دارایی عێراق رایگەیاند، سەرجەم بازرگانان و کۆمپانیاکان
پێویستە سەردانی وەزارەت و دەستەی گومرگی عێراق بکەن بۆ دروستکردنی کارتی هاوردەکردن
و هەناردەکردن، بەپێچەوانەوە مافی هاوردە و هەناردەیان نامێنێت. دەشڵێت،" سەرجەم
بازرگانان دەخرێنە ژێرچاودێری هاوردە و هەناردەی ئۆتۆماتیکی و سیستمی ئەلیکترۆنی
بانکەوە".