ئاماژە بەوەش کراوە، هەریەک لە بەنداوەکانی دوکان و موسڵ و دەربەندیخان بەڕێژەیەکی بەرچاو ئاستی ئاویان بەرزبووەتەوە و ئەوەش هاوکار دەبێت لە رووبەڕوبوونەوەی وشکەساڵی و کەمبوونەوەی ئاو لەمساڵدا.

باس لەوەش کراوە، بەگوێرەی پێشبینیەکانی کەشناسی عێراق چەند شەپۆلێکی تری باران بارین روو لەناوچە جیاوازەکانی هەرێم وعێراق دەکات و ئەوەش وادەکات ئاستی سامانی ئاوی سەرزەوی و ژێرزەوی تا دوو مانگی داهاتوو زیاتر بەرزببێتەوە. وتیشی، "ئاستی لافاو لە ناوچەکانی عێراق و هەرێم بەرێژەی ٣٠٪ زیاتربووە بەراورد بە ساڵانی رابردوو".

لەو بارەیەشەوە، بەسام عەبدولواحید بەڕێوەبەری سەرچاوە ئاوییەکانی پارێزگای سەڵاحەدین رایگەیاند، بارانی چەند رۆژی رابردوو بووەتە هۆی زیادبوونی رێژەی ئاوی رووباری دیجلە و دەتوانن سوود لەو زیادبوونەی ئاوی رووباری دیجلە وەربگرن لە وەرزی هاویندا.

هاوکات لەلایەکی تریشەوە، عەون زیاب وەزیرى سەرچاوەکانى ئاوى عێراق بۆ رۆژنامەى سەباح ئەوەی خستە روو، ئاستى ئاو لە بەنداوەکانى موسڵ، دوکان، دەربەندیخان، حەمرین و عوزێم بەشێوەیەکى بەرچاو زیادى کردووە و ئاوى پێویستیش بۆ باشور و ناوەڕاستى عێراق بەردەدرێتەوە. وتیشی، " یەدەگى ئاوى عێراق لە حەوت ملیار مەترى سێجاوە بۆ ١٠ ملیار مەترى سێجا زیادى کردووە".

ئەوەش لە کاتێکدایە، لە هەفتەی رابردوودا شەپۆلێکی باران بارینی بەهێز رووی لە عێراق و هەرێم کرد و بەهۆیەوە لافاو لە بەشێک لە شارەکان دروستی بوو، پشووی فەرمی راگەیەنرا.