وەزارەتی ناوخۆی عێراق رایگەیاند، زیاتر لە ٢٥٠ کەسیان بە تۆمەتی یاریکردن بە نرخی شتومەک و پێداویستییەکان لە ناوچە جیاوازەکانی عێراق دەستگیر کردووە.
ئەمڕۆ شەممە، میقداد میری وتەبێژی وەزارەتی ناوخۆی عێراق رایگەیاند، لەلایەن دەزگا و فەرمانگەکانی وەزارەتەوە، زیاتر لە ٢٥٠ کەس بە تۆمەتی دەستکاریکردنی نرخەکان لە ناوچە جیاوازەکان دەستگیر کراون.
ئاماژەی بەوەش کرد، بەشێک لە بازرگانەکان لە رێگەی راگەیاندنی
نرخی شتومەک و خۆراکەوە بۆ هاوڵاتییان، هاوکارییان بوون لە رێوشوێنەکانی کۆنتڕۆڵکردنی
نرخەکان.
لە چەند رۆژی رابردووشدا، وەزارەتی ناوخۆی عێراق رایگەیاند،
بەڕێوەبەرایەتی گشتی بەرەنگاربوونەوەی تاوانە رێکخراوەکان لە بەغدا و چەند پارێزگایەکی
دیکە زیاتر لە ١٠٠ کەسیان بە تۆمەتی قۆرغکردنی بازاڕ دەستگیر کردووە.
پێشتریش، وەزارەتەکە ئاماژەی بەوە کردبوو، تیمەکانیان بەردەوامن
لە چاودێریکردنی بازاڕ و نرخی شتومەک و پێداویستییەکان و هەرکەسێک لە مانگی رەمەزاندا
هەوڵی بەرزکردنەوەی نرخەکان بدات، بە توندترین شێوە سزا دەدرێت.
ئەمەش لەکاتێکدایە، حکومەتی عێراق چەندین رێوشوێنی گرتووەتە
بەر بۆ چاودێریکردنی بازاڕ و نرخی شتومەک لە مانگی رەمەزاندا.