PM:03:59:23/09/2023
1268 جار خوێندراوەتەوە
+
-
ئەمیندارێ گشتی یێ یەکگرتوو ڕاگەهاند، حکومەتا رێڤەبرنا کارێن هەرێمێ د
خراپترین رەوشا هەستکرن ب بەرپرسیاریەتێ دایە. دبێژیت ژی، "دەستهەلات بێ
منەتە لهەمبەر ماف و شایستەیێن فەرمانبەران ب گشتی و مامۆستایان ب تایبەتی".
ئەڤرۆ شەمبیێ، سەلاحەدین بەهادین ئەمیندارێ گشتی یێ یەکگرتوو ل دەمێ
پشکداریکرنا وی د کۆنفرانسا گشتیا سەرپەرشتیارێن پەروەردەیا یەکگرتوو ئەویەک
بەرچاڤ کر، حکومەتا رێڤەبرنا کارێن هەرێمێ د خرابترین رەوشا هەستکرن ب
بەرپرسیاریەتێ دایە و ئەڤێ ژی باندۆریەکا زێدە لسەر پرۆسەیا پەروەردە و فێرکرنێ ل
هەرێما کوردستانێ کریە.
بەحسا وێیەکێ ژی کر، حکومەتا رێڤەبرنا کارێن هەرێمێ جودا ژ شکەستنئینانێ د
پرۆسەیا دیبلۆماسی و گۆتوبێژان دا د بیاڤێ پەروەردێ ژی دا مەزنترین شکەستن ئینایە
و هەست ب وێ ناکەت پێشکەفتنا هەر گەل و نەتەوەیەکی گرێدایە ب پەروەردە و فێرکرنێ
کو ل هەرێمێ هاتیە پشت گوهـ هاڤێتن.
ئاماژە ب وێیەکێ ژی کریە، "نەڤیێن مە پتریا هەمی دەمان پێدڤی ب
پەروەردە و فێرکرنێ یە ل قۆناغا باخچە هەتاکو زانکۆ و جهێ دلگرانیا مەیە کو
دەستهەلات گەلەک بێ منەتە لهەمبەر ماف و ئیمتیازاتێن فەرمانبەران ب گشتی و
مامۆستایان ب تایبەتی.