PM:06:37:13/08/2025
1112 جار خوێندراوەتەوە
حزبی کۆمۆنیستی کرێکاری کوردستان دەڵێت، دەستگیرکردنی سەرۆکی جوڵانەوەی نەوەی نوێ و هەڵکوتانەسەر ماڵەکەی سەرکۆنە دەکەین و بەکردەیەکی سەرکوتگەری دەزانین، هاوکات داوادەکەین کە دەستبەجێ ئازادبکرێت. دەشڵێن، دەستگیرکردنی شاسوار عەبدولواحید، سیاسەتی توندکردنەوەی سەرکوتگەری و سەپاندنی ترس وتۆقاندنە، لەلایەن حزبە دەسەڵاتدارەکانەوە، تا خەڵکی ناڕازی کوردستان ناچاربکەن بە بێدەنگی.
ئەمڕۆ چوارشەممە ١٣ـی ئابی ٢٠٢٥، حزبی کۆمۆنیستی کرێکاری کوردستان لە راگەیەندراوێکدا بڵاویکردەوە، دۆخی بنبەستی سیاسی و قەیرانگرتووی دەسەڵاتی پارتی و یەکێتی بەجۆرێك خەتەرناکە کە تەنانەت تەحەمولی ئۆپۆزیسیۆنی سیاسی- پەرلەمانی ناو خێزانەکەی خۆشیان ناکەن، دەستگیرکردنی شاسوار عەبدولواحید، جگە لەوەی گۆشەیەکی تر لە دەسەڵاتی سەرکوتگەری و دژبەئازادی هەڵسوڕانی سیاسی دەخاتەبەرچاو، هاوکات نیشانەی ترسێکی گەورەی حیزبە دەسەڵاتدارەکانە لە هاتنەمەیدان و راپەڕینی جەماوەری.
لە راگەیەندراوەکەدا ئامەژە بەوەشکراوە، بێگومان دەستگیردنەکەی
شاسوار عەبدولواحید، لە فەزای سیاسی کوردستان و ئەو قەیران و بنبەستەی کە یەخەی بە
دەسەڵاتدارن گرتووە، ئەگەر هەر پاساوێکی یاساییشی پیبدرێت، ناتوانێ بەشێک نەبێت لە
سیاسەتی توندکردنەوەی سەرکوتگەری و سەپاندنی ترس وتۆقاندن، لەلایەن حیزبە دەسەڵاتدارەکانەوە،
تا خەڵکی ناڕازی کوردستان ناچاربکەن بە بێدەنگی
دەشڵێن، پارتی و یەکێتی کە بە ئەندازەی تاڵە دەزویەک پەیوەندییان
لەگەڵ خەڵکی کوردستاندا نەماوەتەوە، تەنها رێگای سەرکوت و داپڵۆسین و زیندانیان بەدەستەوە
ماوە بۆ راگرتنی پایە رزیوەکانی دەسەڵاتە میلیشیا چەتەگەرێتیەکەیان.
