ئاماژە بەوەکراوە، لەبری ئاوەدانکردنەوەی شەنگال و دەستەبەرکردنی هەموو خزمەتگوزارییەک بۆ ژیانکردنێکی سەبەرزانە لەناو شەنگال و رێزگرتن لە قوربانیدانی ئێزیدیەکان و بەرێزەوە گێڕانەوەی ئاوارەی نێو کەمپەکان بۆ سەر ماڵ و حاڵی خۆیان و کارکردنی جددی لە ناوەندە عێراقی و جیهانیەکان لەسەر بەجینۆسایدناساندنی مەرگەساتەکەیان، کاری جددیان لەسەر بردنی خێر و بێری شەنگال و تێکەڵکردنی کەیسەکە بە ململانێ سیاسییەکان کردووە.

هاوکات، فراکسیۆنی نەوەی نوێ لە پەرلەمانی عێراق پرۆژە یاسای بەجینۆسایدناساندنی مەرگەساتی ئێزیدیەکانی ئامادەکردووەو بەهەموو توانای خۆیەوە لەهەوڵدایە کە بەهاوکاری هەندێک فراکسیۆنی تر، لەرێگەی تێپەڕاندنی ئەو پرۆژە یاسایەوە لەپەرلەمانی عێراق، دەرگا بۆ قەرەبووکردنەوەی ئێزیدیەکان بکاتەوەو لەداهاتووشدا ببێتە رێگر لە دووبارە بوونەوەی مەرگەساتی لەو جۆرە.
لە کۆتایشدا دەڵێن، ئێمە لە نەوەی نوێ پێمان وایە کە شەنگال دەبێ بۆ شەنگالیەکان بێت و وەک وەفایەکیش بۆ ئەو هەموو قوربانیدانەی ئێزیدیەکان داویانە لە رووبەرووبوونەوەی تیرۆردا دەبێ شەنگال ئاوەدان بکرێتەوەو خزمەتی بکرێت، چونکە ئێزیدیەکان جگە لەو هەموو قوربانییەی داویانە، هاوکات رۆڵ و پێگەیان لە مێژووی خەباتی گەلی کورد دژی دیکتاتۆریەت رۆڵ و پێگەیەکی سەربەرزانەیە و هەمیشە لەبەرەی هەق و دژی زۆڵم و زۆرداری بوون، ئێستاش ئەرکی هەموومانە لەگەڵ ئێزیدیەکان بین و دژی ئەو زوڵمە بین کە لە خۆیان و لە شەنگالیش دەکرێت.

جێی ئاماژە پێدانە، ٣ی ئابی ٢٠١٤ ئەو ڕۆژەیە کە کۆمەڵگەی ئێزیدی هەرگیز بیرییان ناچێت، بەهۆی ئەوەی داعش هێرشی کردە سەریان و ژمارەیەکی زۆری ژن و منداڵ و سەرجەم تەمەنەکان بێسەر و شوێن کرد، ھێشتا برینەکانی ئەو رۆژە لەدڵی ئێزدییەکان ساڕێژ نەبووە و زۆربەیان چارەنوسی کەس و کارییان نادیارە.