وتەبێژی حکومەتی عێراق دەڵێت، لوتکەی عەرەبی کە بڕیارە ١٧ـی ئەم مانگە لە بەغدا بەڕێوەبچێت، یەکێک دەبێت لە گرنگترین لوتکە عەرەبییەکان و وتیشی، هەموو ئامادەکارییەکی پێویست تەواوبووە.
ئەمڕۆ شەممە ١٠ـی ئایاری ٢٠٢٥، باسم عەوادی، وتەبێژی حکومەتی عێراق رایگەیاند، لە کارنامەی لوتکەی عەرەبیدا سەرجەم دۆسیە و قەیرانەکانی ناوچەکە، بوونی دەبێت و باسیان لێودەکرێت.
باسی لەوەشکردووە، ئەو ئاڵنگارییانەی رووبەڕووی
ناوچەکە دەبنەوە لە لوتکەکەدا، گرنگییەکی زۆریان پێدەدرێت.
لە بەشێکی دیکەی قسەکانیدا باسم عەوادی باسی
لەوەکرد، لە ١٢ـی ئایارەوە کۆبوونەوەی ئامادەکاریی بەرپرسانی ئەنجوومەنی ئابووری
بەڕیوەدەچێت و رۆژی دواتریش کۆبوونەوەی ئەنجوومەنی ئابووری و کۆمەڵایەتی، لەسەر
ئاستی وەزیران بەڕێوەدەچێت.
ئەوەشی خستووەتەڕوو، رۆژی ١٥ـی ئایار کۆبوونەوەی
وەزیرانی دەرەوەی وڵاتانی عەرەبی و ١٧ـی مانگیش لوتکەی سەرکردەکانی وڵاتانی عەرەبی
بەڕێوەدەچێت.
ئەوەش لە کاتێکدایە، عێراق لە رابردوودا سێجار
میوانداریی لوتکەی عەرەبیی کردووە، کە میوانداریەکان لە ساڵانی، ١٩٧٨، ١٩٩٠، ٢٠١٢، لوتکەی ئەمساڵیش ٣٤ـەمینی وڵاتانی عەرەبییە، کە عێراق میوانداریی دەکات.