توێژینەوەیەک دەریخستووە، گۆڕینی کەرە و چەورییە تێرەکان بە زەیتی زەیتون دەبێتە هۆی باشترکردنی تەندروستی و درێژکردنەوەی تەمەن بۆ ساڵانێک.
بەپیێ راپۆرتێکی تەندروستی ماڵپەڕی "سکای نیو عەرەبی"، توێژەران بۆیان دەرکەوتووە ئەو کەسانەی رۆژانە زیاتر لە نیو کەوچک زەیتی زەیتون دەخۆن ئەگەری تووشبوونیان بە نەخۆشییەکانی دڵ و سییەکان و زەهایمەر و شێرپەنجە کەمترە.
مارتا گواخ فیری نووسەری توێژینەوەکە و توێژەر لە قوتابخانەی تەندروستی گشتی هارڤارد تی ئێچ چان دەڵێت، "راهاتن لەسەر خۆراکی بەهێز و پارێزەر پرۆسەیەکی قورسە، بەڵام هێنانە ناوەوەی زەیتی زەیتون بۆ ناو ژەمە خۆرەکەکان زۆر گرنگە."
ئاماژەی بەوەشکردووە، "ئەگەر پێویستی کرد گرنگی بە کوالیتی خۆراک و شێوازی ژیان بدەیت، ئەوا زیادکردنی زەیتی زەیتون بۆ خۆراکەکانت وەک جێگرەوەیەک بۆ چەورییە ناتەندروستەکان بژاردەیەکی زۆر باش دەبێت."
گواچ-فێری لە درێژەی قسەکانیدا وتی، زەیتی زەیتون توخمەکانی دژە هەوکردن و دژە ئۆکسانی تێدایە، زەیتی زەیتون دەوڵەمەندە بە ماددە خۆراکییە تەندروستەکان وەک دژە ئۆکسان و پۆلیفینۆل و ڤیتامینەکان، ئەمە جگە لە چەورییە ناتێرە تەندروستەکان.
ر.ئ