لە کاتی کردنەوەی بازاڕی دراودا بەهای دۆلار بەرزبووە و ١٠٠ دۆلار بە ١٤٣ هەزار و ٢٠٠ دینار مامەڵەی پێوەدەکرێت.
ئەمڕۆ چوارشەممە، بەهای ١٠٠ دۆلار لەگەڵ کردنەوەی بازاڕی دراودا بە ١٤٣ هەزار و ٢٠٠ دینار مامەڵەی پێوەدەکرێت و بەوەش بەراورد بە دوێنێ لە کاتی داخستنیدا ٢٠٠ دینار بەرزبووەتەوە.
لە دوێنێوە بەهای
دۆلار نزیکەی هەزار دینار گۆڕانکاری بەسەردا هاتووە و لە ١٤٢ هەزار و ٣٥٠ دینارەوە
بۆ ١٤٣ هەزار و ٢٠٠ دینار بەرزبووەتەوە.
ئەوەش لە کاتێکدایە،
ماوەی چوار مانگە حکومەتی عێراق هەنگاوەکانی بۆ بەرزکردنەوەی بەهای دینار بەرامبەر
بە دۆلار چڕکردووەتەوە و وەک یەکێک لە هەنگاوەکانی بەهێزکردنەوەی بەهای دیناری عێراقیش،
بەڕێوەبەری بەڕێوەبەرایەتی وەبەرهێنانی سەر بە بانکی ناوەندی رایگەیاند، موچەی
کارمەندان و کرێکارانی بیانی بە دینار دەدرێت.
لەلایەکی دیکەوە
کۆمەڵەی بانکە ئەهلییەکانی عێراق رایانگەیاند، بەم زووانە دیناری عێراقی بەهێز دەبێت
و سەقامگیر دەبێتەوە و رێکارەکانی بانکی ناوەندی و دابینکردنی ئاسانکاری زیاتر لە
سەکۆی ئەلکترۆنی بەردەوام دەبێت.
هاوکات لە بودجەدا
بەهای ١٠٠ دۆلار بە ١٣٠ هەزار دینار جێگیرکراوە و چاوەڕوان دەکرێت دوای پەسەندکردنی
بودجە بەهای دۆلار بۆ ئەو نرخە فەرمیە دابەزێت.
نرخی دراوە بیانییەکان لە بازاڕەکانی دراوی هەرێم:
١٠٠ یۆرۆ بە ١٥٤ هەزار و ٥٠٠ دینار
١٠٠ پاوەند بە ١٧٤ هەزار و ٥٠٠ دینار
١٠٠ دۆلار بە پێنج ملیۆن و ١٠٠
هەزار تمەن
١٠٠ دۆلار بە ١٨٩٠ لیرەی تورکی