دوو کاندیدەکەی سوننەکان کێن؟

لایەنە سووننەکان کە دابەشبوون بەسەر دوو بەرەدا لە رۆژی ١٦ـی ئایار و کۆبوونەوەی لایەنەکان بۆ دیاریکردنی کەسێک کە ببێتە سەرۆکی پەرلەمانی عێراق دوو کەس بەربژێرکراون.

بەربژێری یەکەمی سوننەکان؛

سالم مەتەر عیساوی کە ناسراوە بە ( سالم عیساوی ) لە ساڵی ١٩٧٢ لە ئەنبار لەدایکبووە و خاوەنی بڕوانامەی بەکالۆریۆسە لە یاسادا، لە هەمانکاتیشدا لە خولى سێیەمى پەرلەمانى عێراقدا بووە بە پەرلەمانتار، لەم خولەشدا جارێکى دیکە بووەتەوە بە ئەندامى پەرلەمان.

سالم عیساوت کاندیی بەشێکى سوننەکانە کە بریتین لە فراکسیۆنەکانى عەزم و حەسم و سیادە و بەشێک لە چوارچێوەى هەماهەنگی شیعەکان پشتیوانى لە سالم عیساوی دەکەن بۆ بوون بە سەرۆکی پەرلەمانی عێراق.

بەربژێری دووەمی سوننەکان؛

مەحمود داود ئەلمەشهەدانى دووەم بەربژێری سوننەکان و ناسراو بە ( مەحمود مەشهەدانى )

ساڵى ١٩٤٨ لە بەغدا لەدایکبووە و خاوەنى بڕوانامەى بەکالۆریۆسە لە پزیشکیدا، پێشتر لە خولى یەکەمى پەرلەمان لەساڵى ٢٠٠٦ تا ساڵی ٢٠٠٨ سەرۆکى پەرلەمانى عێراق بووە.

مەشهەدانی کاندیدى بەشێکى سونەکانە کە ئەوانیش فراکسیۆنی تەقەدووم بە سەرۆکایەتى محەمەد حەلبوسى و فراکسیۆنى سەدارەیە کە خۆی سەرۆکایەتى دەکات، بەشێک لە چوارچێوەى هەماهەنگی شیعەکان بەتایبەت دەوڵەتى یاسا بە سەرۆکایەتى نورى مالیکى پشتیوانى مەشهەدانى دەکەن بۆ بوون بە سەرۆکی پەرلەمانی عێراق.

لەبارەی دەرچوونی یەك لەو دوو كاندیدە یان هەڵگرتنی دانیشتنەكە بەبێ‌ هەڵبژاردنی سەرۆكێكی نوێ‌ بۆ پەرلەمانی عێراق، هێزەكانی چوارچێوەی هەماهەنگی دابەش بوون، ئەوەش وادەكات دانیشتنی ئەمڕۆ بەڕووی هەموو ئەگەرەكاندا كراوەبێت. چونکە لەكۆبوونەوەی رۆژی ١٦ـی ئایار، چوارچێوەی هەماهەنگی لە کۆبوونەوەکانیاندا لەبارەی دەنگدان بە یەكێك لەو دوو كاندیدە هیچ رێککەوتنێکیان بۆ نەكراوە.

لە مانگی ١١ـی ساڵى رابردووەوە پۆستى سەرۆکى پەرلەمانی عێراق بە بەتاڵى ماوەتەوە و پەرلەمان لە چوار هەوڵدا بۆ هەڵبژاردنی جێگرەوەی حەلبوسی شکستی هێنا بەهۆی نەبوونی کۆدەنگی لەسەر یەک کاندید، ئەمەش لەبەر رۆشنایی پارچەپارچەبوونی سوننە و پێداگری چوارچێوەی هەماهەنگی لەسەر کاندیدکردنی کەسایەتی نوێ یان هێشتنەوەی موحسین ئەلمەندەلاوی، جێگری یەکەمی سەرۆکی پەرلەمان، وەک سەرۆکی بە وەکالەت.