ئاماژەی بەوەش کرد، ئەو گرفتەی لە لیستی مووچەی مانگی چواردا دروستبووە کێشەی تەکنیکیە و رەنگە لەم هەفتەیەدا چارەسەربکرێت و تاکۆتایی هەفتە بەغدا مووچەی مووچەخۆرانی هەرێم رەوانەی وەزارەتی دارایی حکومەتی کاربەڕێکەر بکات. وتیشی، " بەبانکیکردنی مووچەی مووچەخۆرانی هەرێم سەرجەم گرفتەکانی مووچە چارەسەردەکات و پێویستیشە تا کاتی یەکلایی بوونەوەی گفتوگۆکانی بەغدا و هەرێم لە بارەی هەژماری من و بانکە حکومییەکان، بەغدا مووچەی مووچەخۆران بە پارەی نەختینە بنێرێت".

باسی لەوەش کرد، بەپێی دەستوور هاوڵاتیانی هەرێم و عێراق یەکسانن و بەو هۆیەشەوە فەرمانبەرانی هەرێم دەبێت مووچەکانیان هاوتای عێراق بکرێت چونکە ناکرێت بەهۆی کێشەکانی نێوان بەغدا و هەرێم مووچەخۆرانی هەرێم ببنە قوربانی و دوو مانگ مووچە بدرێت و جارێکی دیکە دووبارە کێشەکانی نێوان بەغدا و هەرێم سەرهەڵبدەنەوە.

هاوکات، بەپێی زانیارییەکانی ئێن ئاڕ تی، ناردنی مووچەی مانگی چواری مووچەخۆرانی هەرێم بەهۆی هەبوونی گرفتەوە دواکەت، بەڵام ئێن ئاڕ تی ئەوەی زانیوە، گرفتەکە تەنها لە دەرخستەی کۆتایی مانگی سێدا نەبووە، بەڵکو گرفت لە رێککەوتنەکان لەگەڵ هەرێمدا هەبووە.

ئەوەش لەکاتێکدایە، لە ئێستادا مووچەخۆرانی هەرێم لە مانگی ئایاردان، بەڵام هێشتا مووچەی مانگی نیسانیان وەرنەگرتووە، لەکاتێکدا، لە سەرەتای مانگی نیسانەوە حکومەتی عێراق داوا لە حکومەتی کاربەڕێکەر دەکات لیستی مووچەی مووچەخۆرانیان بۆ مانگی نیسان بۆ بنێرن، سەرەڕای درەنگ ناردنی لیستەکە لەلایەن هەرێمەوە، بەڵام گرفت لە لیستەکە و دەرخستەی کۆتایی مانگی ئازاریشدا هەبوو، ئەوەش ناردنی مووچەی دواخستبوو و لە ئێستاشدا گرفتی ئەوە هەیە، کە هەرێم داهاتەکانی رادەستی بەغدا ناکات بۆ ئەوەی بەزووترین کات بەغدا مووچەی مووچەخۆران بنێرێت.