هاوکات بەگوێرەی راپۆرتی بانکی ناوەندی، بەمەبەستی بەرزکردنەوەی ئاستی متمانەی بانکی و دوورخستنەوەی بازرگانان لە بازاڕەکانی ناوخۆ بەتێکڕا چوار ملیار و ٤١٣ ملیۆن و ٨٩١ هەزار و ٩٦٨ دۆلار بەشێوەی حەواڵە بۆ بازرگانانی ناوخۆ و دەرەکی بە نرخی فەرمی بانکی ناوەندی خراوەتەڕوو.

هۆکارەکانی بەرزبوونەوەی فرۆشی دۆلاری بانکی ناوەندی چین؟

بانکی ناوەندیی عێراق لەبارەی بانکە سزادراوەکانەوە بە دیجیتاڵ میدیای ئێن ئاڕ تی راگەیاند، نوێنەرایەتی بانکی ناوەندی لە کۆبوونەوەی ئاساییان لەگەڵ وەزارەتی گەنجینەی ئەمریکا سەبارەت بە هەڵگرتنی سزای سەر بانکەکانی عێراق لە سوودی بانکەکانی عێراق گەیشتنە رێککەوتن. وتیشی، " ئەنجوومەنی چاکسازی بانکەکان دروستکراوە کە تێیدا بانکەکان لەژێر رێنمایی بانکی ناوەندی و ئەمریکا مامەڵەداراییەکانیان دەست پێ دەکەنەوە و بەوەش دەستڕاگەیشتنی بانکەکان یەک ملیار دۆلار بەرزبوونەوە بەخۆیەوە دەبینێت".

بانکی ناوەندی و جەی پی مۆرگان لەسەر چی رێککەوتن؟

رۆژی ١٨ـی نیسان بەرپرسێکی بانکی ناوەندی بە دیجیتاڵ میدیایی ئێن ئاڕ تی راگەیاند، رێککەوتنەکانیان لەگەڵ جەی پی مۆرگان نرخی دۆلار بەرەو سەقامگیری زیاتر دەبات و لە رۆژانی داهاتووشدا رێکارەکان بە تەواوی دەچنە بواری جێبەجێکردنەوە. وتیشی، " پێنج بانکی دیکە وەک گوێزەرەوەی دۆلار بۆ بازرگانان لە لیستی بانکە سزادراوەکان دەرهێندراون و بەوەش ١٠ بانکی ناوخۆیی دەتوانن مامەڵەداراییەکان ئەنجامبدەن".

رێککەوتنی بانکی ناوەندی و وەزارەتی گەنجینەی ئەمریکا بۆ مامەڵەداراییە نێودەوڵەتییەکان؛

لەو بارەیەشەوە چاوگێکی ئاگادار لە بانکی ناوەندی بە دیجیتاڵ میدیای ئێن ئاڕ تی راگەیاند، لە ئێستادا سێ بانکی دیکەش سزایان لەسەر هەڵگیراوە کە تایبەت دەبن بە دابینکردنی یێنی چینی و بازرگانە چینییەکان. وتیشی، " لەرێگای حەوت بانکەوە ساڵانە بڕی ١٥ بۆ ٢٠ ملیار دۆلار تەرخان دەکرێت بۆ ئاڵوگۆڕی بازرگانی نێوان چین و عێراق لە ژێر سەرپەرشتی سیستمی بانکی نێودەوڵەتیدا".

قۆناغی سەرەتایی رێکەوتنەکانی بانکی ناوەندی و ئەمریکا لەبارەی بانکە سزادراوەکان؛

بەرپرسی راگەیاندنی بانکی ناوەندیی عێراق بە دیجیتاڵ میدیای ئێن ئاڕ تی راگەیاند، رۆژی ٦ـی نیسان لەگەڵ نوێنەرایەتی ٣٢ بانکە سزادراوەکە کۆبوونەتەوە و بە گوێرەی کۆبوونەوەکەش بڕیاردراوە کە لە چوارچێوەی سیستەمی بانکی نێودەوڵەتی چاکسازییان تێدا بکرێت و لە قۆناغی سەرەتاشدا بە شێوەیەکی دیاریکراو دەتوانن داواکاری بۆ کڕینی دۆلار و تمەن و یۆرۆ و لیرە و یێنی چینی پێشکەش بکەن کە لە ٧٪ تێکڕای رێژەی فرۆش زیاتر نەبێت.

کاریگەریی هەڵگرتنی سزای سەر بانکەکان لەسەر ئابووری و متمانەی بانکەکانی ناوخۆی عێراق؛

عەلی عەلاق پارێزگاری بانکی ناوەندی رایگەیاند، لەگەڵ وەزارەتی گەنجینەی ئەمریکا سەبارەت بە بانکە سزادراوەکان بۆ کەمکردنەوەی سزاکان لەسەریان بە مەبەستی فراوانکردنی ئاستی بازرگانی ناوخۆی و دەرەکی چەند جارێک کۆبوونەتەوە و ئەوەش کاریگەرییەکی ئەرێنی لەسەر سیستمی بانکیی بانکە عێراقییەکان جێدەهێلێت.

وتیشی، "دۆلار و هیچ دراوێکی دیکە نادرێتە هیچ بانک و بازرگانێک، ئەگەر نەزانرێت بۆچیەتی و بۆ ئەو مەبەستەش دەبێت لە سیستەمی سویفتدا خۆیان تۆماربکەن بە پێچەوانەوە مافی مامەڵەکردنیان بە دۆلار نامێنێت،و لەگەڵ تۆماربوونیان لە سیستمەکەدا ئەوە ئاستی خستنەرووی دۆلاری مانگانە زیاتردەبێت".

هێڤیدار شەعبان – دیجیتاڵ میدیای ئێن ئاڕ تی