سەرۆک وەزیرانی عێراق رایگەیاند، لە ڕۆژی جیهانی ئازادی ڕۆژنامەگەریدا پشتیوانی بۆ هەموو رۆژنامەنوسان دووپات دەکەنەوە. دەشڵێت، " پێویستە به بێ سنووردارکردن و ناچارکردن کارەکانیان بەڕێوەببەن، لەسەربنەمای دەستوور ئەرکی ئێمەیە که ئازادییه گشتییەکانیان دەستەبەر بکەین".
ئەمڕۆ هەینی، نوسینگەی راگەیاندنی سەرۆک وەزیرانی عێراق لەبارەی رۆژی جیهانی ئازادی رۆژنامەگەرییەوە راگەیەندراوێکی بڵاوکردەوە و تێێدا هاتووە، رۆژی جیهانی ئازادی لە تەواوی رۆژنامەنوسانی عێراق پیرۆزبێت و هیواداریشن کە لە کارەکانیان بەردەوامبن.
ئاماژە بەوەش کراوە، محەمەد شیاع
سودانی سەرۆک وەزیرانی عێراق سوورە لەسەر
ئازادی رادەربڕین و بۆ ئەو مەبەستەش، داوا دەکات کە هیچ فشارێک لە رۆژنامەنوسان نەکرێت
بەرامبەر بە کارەکانیان.
باس لەوەش کراوە، ئازادی رۆژنامەنوسان
بەگوێرەی دەستور دەستەبەر دەکرێت و سەرجەم لایەنەکان پێویستە پابەند بن بە پاراستنی
ئازادی رادەربڕین لە ناوخۆ و دەرەوەی خاکی عێراقدا. وتیشی، "رۆژانامەنوسانی عێراق
کارێکی گرنگ دەکەن و دەبێت رێزیان لێبگیرێت".
لەو بارەیەشەوە، رێکخراوی لێبوردنی
نێودەوڵەتی رایگەیاند، پێویستە دەستبەجێ بەرپرسانی هەرێم کۆتایی بە هێرشەکانیان بۆ
سەر ئازادی رۆژنامەگەریی و ئازادی رادەربڕین و دەستگیرکردن و لێدان و دادگایکردنی
نادادپەروەرانەی رۆژنامەنووسان بهێنن. دەشڵێت، "سەرەڕای چەندین هۆشداری بەڵام
بەرپرسانی هەرێم هێشتا بەردەوامن لە رێگەگرتن لە رۆژنامەنووسان و ئەشکەنجەدانیان کە
ئەوەش پێچەوانەی یاساکانی مافی مرۆڤ و رۆژنامەنووسانە".
باس لەوەش کراوە، دەسەڵاتدارانی هەرێم
شانازی بەوە دەکەن کە ئازادیی رۆژنامەگەریی لە هەرێم هەیە، بەڵام ئەوە بانگەشەیەکی
گاڵتەجاڕانەیە بە لەبەرچاوگرتنی سەرکوتکردنی ئازادی رۆژنامەگەری و هەراسانکردن و تۆقاندن
و دادگاییکردنی رۆژنامەنووسان، بەتایبەتی ئەوانەی کە راپۆرتیان لەسەر دۆسیەکانى گەندەڵی
نوسیوە یان ڕەخنەیان لە مامەڵەکردنی دەسەڵاتداران لەگەڵ پرسە کۆمەڵایەتییەکان
گرتووە.