وەزارەتی کارەبای حکومەتی کاربەڕێکەری هەرێم رایگەیاند، لە ٢٤ کاتژمێری داهاتوودا هەرسێ وێستگەی کارەباى هەولێر و سلێمانی و بازیان دەکەونە کار.
ئەمڕۆ چوارشەممە، وەزارەتی کارەبای حکومەتی کاربەڕێکەری هەرێم راگەیەنراوێکی بڵاو کردووەتەوە و تێیدا هاتووە، لە ٢٤ کاتژمێری داهاتوودا هەرسێ وێستگەی کارەباى هەولێر و سلێمانی و بازیان دەکەونە کار.
ئاماژە بەوەش کراوە، ئێوارەی رۆژی سێشەممە هەناردەی گاز لە کێڵگەی کۆرمۆر بۆ
وێستگەکانی بەرهەمهێنانی کارەبا دەستی پێکردووە و پەستانی گاز بۆ وێستگەکان بەرز بووەتەوە.
ئەوەش خراوەتە روو، بڕی ٢٧٠ ملیۆن پێ سێجا گاز لە کۆی ٥٢٠ ملیۆن پێ سێجای پێویست
گەیشتووەتە وێستگەکان و دەکاتە نیوەی توانایی وێستگەکان.
باس لەوەش کراوە، لە ٢٤ کاتژمێری داهاتوودا هەرسێ وێستگەی هەولێر و سلێمانی
و بازیان دەکەونە کار.
ئەوەش لە کاتێکدایە،
رۆژی ٢٦ـی ئەم مانگە، کاتژمێر ٦:٥٠ خولەکی ئێوارە بۆ هەشتەم جار کێڵگەی غازی کۆرمۆر
بە ئامانج گیرا، بەهۆی هێرشەکانیشەوە، چوار کەس گیانیان لەدەستدا.
دواتر وەزارەتی
کارەبا و سامانە سروشتییەکانی حکومەتی کاربەڕێکەری هەرێم بڵاویان کردەوە، بەهۆی هێرشێکی
درۆنی بۆ سەر کێڵگەی غازی کۆرمۆر ناردنی گاز بۆ وێستگەكانی بەرهەمهێنانی کارەبا
راوەستاوە و بەوهۆیەوە نزیکەی دوو هەزار و ٥٠٠ مێگاوات کارەبا کەم بووەتەوە.
لەماوەی دوو ساڵی
رابردوودا زیاتر لە ١٦ موشەک و درۆن ئاراستەی کێڵگەی غازی کۆرمۆر کراوە کە بەهۆیەوە
زیاتر لە دوو هەزار و ٥٠٠ مێگاوات لە کارەبا کەمی کردووە لە هەر هێرشێکی مووشەکی و
درۆنیدا.